Wednesday, June 24, 2009

Dagiti Tagilako iti Igid ti Kalsada

Maysa kadagiti napintas a ganuat a napiliiwko ket dagiti suka ken basi iti Sta. Maria, partikular kadagiti barangay iti Maynganay Sur ken Norte. Napintas a ganuat ti panangidisple kadagiti produkto iti igid ti kalsada. Mayat la unay nga addang para iti livelihood project. Dakkel a tulong daytoy kastoy a ganuat Saanna laeng a parang-ayen ti pagsapulan no di degdeganna dagiti lumugar nga agagawa. Pagsapulan a nangrugi iti time immemorial wenno saanen a malagip no kaano gapu iti kinabayagnan, a kas produkto, a kas nakairuaman a pagsapulan.

Ti panangidisple kadagti tagilako iti igid ti kalsada ket saanen a kabarbaro a kapanunotan. Ta kadagiti ili iti Pangasinan nabayagen nga ar-aramiden dagiti lumugar. Ultimon a mais a liningta ket nalatak unayen a sumardengan dagiti lugan ken uray kadagiti bus. Kas koma iti liningta a mais iti Binalonan; ti suka, basi ken bugguong iti Pozzorubio; ti padaw iti Sison a nakakabil iti timba ken dadduma pay. Iti daytoy a mapaspasamak, ipakpakitan ti pamastrekan ti lugar.

Kinapudnona, ti agar-aramid iti buneng iti maysa a barangay iti Pozzorubio ket saan laengen a ditoy ti klienteda no di ket iti ballasiw taaw. Kadagiti espada a naaramat iti maysa a pelikula ni Mel Gibson ket partuat dagiti lumugar. Dayta ti mangipakita a ti panangidispley kadagiti tagilako iti kalsada ket dakkel a ganuat.

Iti probinsia, mapappapigsa ti panaglako kadagiti produkto babaen iti panagidisley kadagiti kalsada. Ngem adu pay laeng iti saan a nakapanunot ti kinaimbag nga ibunga ti kastoy a ganuat. Anansata, addan dagiti kumalab kadagiti bus nga aglako iti kalamay ken adda pay ti hilera dagiti puesto iti igid ti kalsada iti mismo nga ili ti Candon, maiyad-adu koma pay dagiti dumagasan, tay koma met adda pagparkinganna.

Kas iti especial bibingka iti Bantay, nalawa ti parkingan dagiti dua nga agar-aramid. Ngem diak makita a displey dagiti produkto a kornik ti Bantay ken Candon. Nupay agmalmalem, ken pasaraysa pay agpatpatnag a nakabitin dagiti buneng, kampit, kumpay, arado ken dadduma pay a kanaigna a produkto iti Brgy. Caburao, Santiago, ing-ingpek met a makita dagiti isu met laeng a produkto iti Manueva, Santa ken iti Bantay.

Dagiti inabel iti Santa ken Bantay? Saanko a makita, ngem ketdi, addadan kadagiti malls ken dadakkel a pagtagilakoan ken kadagiti tiendaan a mismo, a kas kadagiti sumagmamano nga alahas nga aramid dagiti alahero/alahera iti Bantay. Idinto nga adda met idi ti sitsaron iti Narvacan, partikular iti krosing, ngem idi ngimmina ti karne ti baboy, nagawan metten. Sitsaron daytay nailutluto pay ngem bagnet ken kumarandikang.

Immadu ti display nga alsong ken gilingan iti San Esteban. Adda payen dagiti slabs wenno nakorte a bato nga aramiden para iti flooring, dalan, diding ken uray annian a pangusaran. Idinto ta pasaray taratar iti display nga usaren iti panaggapas iti Candon, Sta. Lucia ken Sta. Cruz. Dagiti linaga iti Candon ken Tagudin. Dagiti ubas iti Narvacan nga ikalabda wenno yuli kadagiti bus ken dadduma a lugan.

Amin dagitoy ket mangipakita ti kinasaldet ken kinagaget ni Ilokano. A saan laeng nga iti mismo a tiendaan, kadagiti malls, department stores ken dadakkel a pagtagilakoan iti inda pagasisawan no di ket uray sadino a lugar a pagdupodupanm uray iti igid ti kalsada.

Iti aniaman a lugar, no kayat iti rumang-ay, nasken a agagawa. @

3 comments:

VF said...

Diay kadi Bantay ti ayan ti espesyal bibingka itay Kakang? Naimas, naraman kunak met, ti 'bibingka', lalo no kapudpudotanna ket saan pay a nabunglog diay butterna. Ngem im-imasek pay laeng tay puto-bibingka a tugtugawan tay balasang a nakakain hehehe!

Diay panganan diay Sison(?) ti kaykayatko idi a dumagasan aglalo no maranaan dagitay padak a sutil nga empleado dagiti bus a mapan Ilocos.

Dagitay man palag nga ikan diay Damortis ti saanko a maliwayan a dagasen no agaw-awidak. Saanda unay a naapgad.

Wen agpayso ta kunam. Mayat a supusop a pagsapulan ti panaglako kadagiti igid ti kalsada ngem nasaysayaat siguro no biangan ken tulongan ida ti local government tapno adda seguridad; para kenni aglako kenni gumatang.

Mustan Giem?

Ka Iddo said...

Nasayaat met, giem... wen 'diay Bantay dayta bibikaan... idiay Sison dayta panganan a kukuansa daydi Art Padua...awane ti dalag,ngem adda dagitay padaw idiay sison.... adu ti dumagasan a gumatangan... husto ta kunam, tulongan koma ti gobierno dagitoy...

Ka Iddo said...

Nasayaat met, giem... wen 'diay Bantay dayta bibikaan... idiay Sison dayta panganan a kukuansa daydi Art Padua...awane ti dalag,ngem adda dagitay padaw idiay sison.... adu ti dumagasan a gumatangan... husto ta kunam, tulongan koma ti gobierno dagitoy...