Saturday, December 13, 2008

Paskuan, Ninong, Agawid Kadi Ni Daddy?

Puraw manen dagiti rabiik ita a paskua
No dinnot’ ken sinot’ pakiaginaldoan iti sungbat
Ti mawaw naganus a muging ni Armando.

Krus lattat’ iborda ti rinibu a dagum iti konsensia
Ta diak maited nga aginaldo ti kinaagpaysu
Iti agkerkeroling mabisin iti kinapudno.

Siak ti belen a nagiddaan sandi ti bara ti arakop
Ken rusrusodan ti dissuor ti sainnek
Ngem awan dila ti parol kadagiti balikas-lawlawag

Nagkerolingak napan a tawen iti daniw ni Emman Lacaba
Indayak iti noche buena dagiti balikas a naaginaldoan
Ngem di naalimon agedad lima ti imbuksilan.

Dina maawatan ti kawar iti ngulayngulay ti Kaigorotan.
Dina maawatan panagampayag ti ulemshew iti Cordillera.
Dina maawatan a nasken a gaburan ti ama temtem a panawanna.

Kas ay-ayo, subuak no kua ti naganus a nakem
Kadagiti sabongsabongan-tinagapulotan a balikas
Iti SM, Jolibee, Mc Do ngem di agtik-ab kuselan a ray-aw.

Ngamin nagresidensian iti mugingnat’ saludsod
“Paskuan, Ninong, agawid kadi ni Daddy?”
“Agawid, balong, wen, agawid ita paskua…”

Nagarteak idi, agarteak manen ita, ken ‘to manen’?
Maysa met naindaklan nga arte ti panaglibak
Ti arte a panangapput mulagat ti kinapudno.

Ti kinaagpaysu, kinnan ti Karayan Chico
Ti nalayog a saleng a napintaan nalabaga a krus
Maikatlon daytoy a paskua a lumabas…

11 comments:

Ka Loren said...

Kas 'tay kunan ni Dr. Paul Joseph Goebbels, no ti ulbod ket maulit-ulit, agbalin met a pudno, di kadi Ka Iddo?

Kasano aya ngamin nga ibaga nga agpayso: linipaklipakda ni tatangmo, pinadingalngalanda ti buli, bimtak ti bangabangana ket pimsuak ti utekna, sada kinugtaran ket naarinebneb sadiay Chico!

Ngem, siputam ket agngarebngeb ti bumigbeggang a maysa manen a saludsod. Kasano ngamin aya, Ka Iddo?

Pinalabsakon daytay Duyogmo ket adda man assignmentko. Palpasek ita a lawas ket ipatulodkonto kenkan a ta pirsa-pirsayem man ketdi no masangom Apo.

Ka Iddo said...

ipatulodmo a kitaenta, bareng no maikamakammo iti pasalip ti italy... tay man ketdi pakasaritaan ti nagpukaw wenno inggagara a pinukaw iti view point ti ina wenno ama wenno anak

ka loren said...

Naay, Apo, pasalip metten aya daytoy ibagbagayo ket padpadasli pay lang daytay saritak. Saanko nga ipatulod kenka daytay "Sapatos" ta nakitamon ket kasla pangdeclamation, ipakitak koma daytay "Karudkod ken Salaksak" ngem binbinsirek pay laeng a nalaing no nasalawko met laeng dagiti singasing sadiay duyogmo. Daytoy madama ket eksperimento a nakabasar sadiay istruktura ti 'Hulagpos'. Padasek man ngarud a palpasen ket anusannakon, a, a suruan sir ke' wan met mikol a gastoen idta workshop...

Ka Iddo said...

agkamikolka a, no mangabakka, sir, hehehe!

Ka Loren said...

Sapay a, koma, ta kasta!

Naimbag a Paskuayo Aminen dita TAWID Sir!

Ginabsuonankan Sir, sadiay, mailboxmo :-)

VF said...

Ni, mayatman ti saritaanyo a dua ditoy. Agkansion tayo man la, --aweng ti "I saw Mommy Kissing...":

"Nakitak ni Ninong di rabii
Diay sirok ti krismastri.
Sandina siguro ni Dadi,
Ta ungngona met ni Mami,
Nakitak
ni
Ninong
di rabii!"

Ka Iddo said...

di bale ta ninong met, pansamantala laeng a sandi, hehehe! yos, naglam-ek, kaskam met la agnanaeden iti uneg ti ref!

VF said...

isu met reklamoda diay ilocos Kaka.

"Aginudo kayo a," kunak met. Saanda kano met a maibulsa diay beggang.

"Iboteyo diay napudot a danum," insungbatko met. Saanen a nakatagari diay lakay ngem nangngegko diay dayamudomna...

"wen met nga agpayso aya, kasla agdalagan!"

...ngem ne, Kakang, wan basbasolko no mapessaan dagita singin a tiltillayon! :-)

VF said...

Sinubliak daytoy Kaka ta iseriosok man dayta inudo-ti-idda ta barbareng makatulong kadagiti malammin nga awan pay kabinnukotna. Tawagna daytoy iti ayanmi ket Hot Water Bag.

No adda magatang a tunay a Hot/Cold Water Bag dita (kadawyan nga usar dagitay adda rayumana) ket nasaysayaat pay. Ipanda laeng diay uneg ti salladayda ket agpauten daytoy iti uppat nga oras. No awan met magatang, mabalinen tay ordinario a bote kas koma tay family size coke, plastic wenno saan, basta la ketdi maserraan a nasayaat. Balkotenda kalpasanna iti tualia wenno kaarngina sada iseksek diay salladayda and presto, addan napudot a luppo nga inudom!

hehehe...sowi, diak latta maikkat ti kinaangawko ngem peksman, aramidko dayta no agsub-zero ditoy ayanko. Kunam pay, mayat kawiwitko kenni Sallie!

La kastan Kakang, baka no adda makasukal kadaytoy tsismisko hehehe!

Ka Iddo said...

no idiay probinsia, wen, uso ti aginudo, dawisem ti burrarawit diay tinapay sa idalamadam ken ikape iti kinirog a bagas... no kastoy a panaglalam-ek, nadalus ti paraangan iti probinsia gapu kadayta inudo... hotwaterbag kunam? wen, isu ti aramatko ta sumakit met ti siket, yos, ket di met maagasan ti kinod, hehehe!

ket umayka met mangibalikbayanen a, ti agur-uray, hehehe!

ka loren said...

hay, apo. dayta ginudo ket mayat Kakakang. Mapidut amin a ruting ken bulbulong tapno a maaramid a temtem ket no adda metten a ti temtem ket ipapudot metten a, daytay puto ken tinubong. Mayat dayta kasla barbecue a tinapay, yos! Sa ket maibulon ti umas-asuk a caferice.

Ti dakes ket, 'da met daytay clean air act, maiparit ti agpuor. Nabara ngarud a Paskuayo, Kakakang.