Tuesday, December 02, 2008

Kayokayo, Baribari

Kayokayo, baribari, tagtagari!
Lumabaskam’ apo, ditoy pagarianyo…
Dakami ti lasag ken dara
Ti nakalibas a balud a balikas
A rebelde iti mahika
Dagiti marmarna iti trono…
Inkam dita pagbutbutngan a sirok
Ti duog a balite ti di maiwagat a basol
Tapno yatang ti dalem ken luppo
Ti kurarayan a pluma
Ken binagkal a kinapudno
Iti sarukang linak ken pia
A pangdundonanmi ti kararua
Ti pasientemi a naidalit iti sakit
Iti ikamen panagtuok ken rigat…
Isu a palabsendakam’ apo
Ta awitmi ti namnama a sukal
Ti nakasalapon nga ilimi…
Fiat justitia, ruat caelum
Ad majorem Dei gloriam

-JAIME M. AGPALO, JR.
Brgy. Pangascasan, Sual
Pangasinan

Ti daniw a para iti naan-annongan nga ili ken naipablaak iti Bannawag, Hunio 26, 2000

6 comments:

Ka Iddo said...

mangatangtayon kadagiti sinurat a pangalaw ti agsakit nga ili

Ka Iddo said...

nagbileg a mangam-amling daydiay nagbiag a sallapiding iti pingping...

Nelson said...

nagmayat daytoy daniwmo, mang jim. no maisalip koma ket siak ti hurado, baka Umuna a Gunggona, he-he!

Wen gayam, manong, agyamanak iti pammalubosmo iti panangipablaakmi iti daligcon journal dagiti sinuratyo nga adda pakainaiganna iti ili, kasta metten kadagiti salaysayyo a makatulong iti adda pay a pannakapatadem ti pluma dagiti mannurat nga Ilokano ken pannakapadur-as pay ti literaturatayo.

Dagitay pay la naud-udi wenno adda iti tukot ti yun-unatayo nga ipablaak sadiay tapno kasla kabarbaroda a putar.

daydiay salaysay a para kadagiti mannurat ket inrugimin nga impablaak. Kasla kolum ti namay-anmi. Temporario nga impaulomi pay la ti nagan dagiti blogsyo ken mang roy. No kayatyo a masuktan ti paulona, ibagayo laeng. ken di la mabalin nga ikkanmi iti ladawanyo iti nasaomi a kasla (pay lang) kolumyo, manong? Pakaalaak, aya? Nagbassit sa met unay ngamin daytoy ladawan dita a nakapaskil. Ken no kayatyo nga ikkantay iti ladawanyo. Ngem mas presentabol ngamin no kua iti panagkunami.

Manen, agyamanak

Ka Iddo said...

mabalin latta, nel...

VF said...

... an nescis, mi fili, quantilla sapientia mundus regatur?

Kumusta kabsat?

:-)

Ka Iddo said...

Dei gratia aeqou animo, VF