Friday, October 03, 2008

Sabali ti Tinurongnan, Abirat!

Napangilangilkami. Dimi kanunongan ti iseserrek (manen) ni Manny “Pacman” Pacquiao iti pulitika. Iti panagkamengna iti Kampi a partido ti pangulo, lalo nga immuneg isuna iti gayonggayong iti dina ammo a lubong. Maysa a lubong a saan a maiparberng iti kas kenkuana nga idolo ti agtutubo. Lubong a nasken koma nga adaywanna. Lubong a ditoy ngatan iti pagultimoan iti kiray ti bituenna no dina ammo iti agimutektek.

Iti laeng damo nga itatapogna iti panagbotos, saanna a naangot ti kinaadda ti nalimed nga intension dagiti nangsugsog kenkuana. Saanmi a tagibassiten, ngem mamatikami a dagitoy la ketdi anniniwan iti asidegna iti mangpataray iti gobierno nga iggamanna no inkaso nga adda gasatenna. Wen, adda dagiti a nangrienda iti local a gobierno a saan a nakadap-aw iti eskuelaan, ngem dagitoy ket nasubok iti kabaelanda a nangipangulo iti maysa a local a gobierno. Naitandudo ken nasibbolda ti respeto ken panagtalek kadagiti kailianna, a kas maysa a mabigbig ken pagwadan a lider.

Ngem ni Manny? Saan pay a nasubok iti kabaelanna a mangidaulo. Isu a dimi kanunongan iti itatapogna iti pulitika. Mas naim-imbag pay nga adayo no dagiti millionesna, panawenna, ti impluensiana ket iburayna laeng iti sports nga isu iti pudpudno a lubongna ken isu ti ‘ari’ iti boksing, Apay a saan a daytoy iti tapoganna a saan ket a ti pulitika? Nagadu dagiti agtutubo a kayatna iti agsanay nga agboksing, ngem agkurangda iti pagsanayan, agkurangda iti mangisuro kadakuada iti umno nga aramidenda. Nagadun a retiradon a boksingero a nangited iti pammadayaw iti pagilian, ngem awan man laeng iti konsueloda iti panagpampannimidda iti malem. Ti pagilian ket agsapsapul iti kas iti caliber ni Manny. Napaneknekanen nga iti boksing a naaddaan iti medalia ti Filipinas iti Olimpiada kadagitoy a panawen. Isu a nasaysayaat la koman a daytoy iti tutokanna a saan ket nga iti pulitika. Sursuroenna koma a timbangen dagiti addang ken pangeddengna ta dinto ket maikursong.

Panangtulong kadi ti panggep? Ala, wen. Napintas a panggep. Ngem ad-adda a makatulong iti panagkunami no awan isuna iti pulitika. Makatulong latta isuna uray awan iti pulitika. Nadaydaydayaw nga adayo iti itutulongna no awan isuna iti pulitika. Iti pulitika, no nangitedka, nasken met ta dumawatka. Ket ti nagpadawat, dumawat met daytoy. Gamitan ti situasion ditoy a lubong. Ket ti makuna nga itutulong ket saan a maiparbeng a termino no dayta a tulong ket pursigido iti panangnamnama iti kasukatna.

Saan koma a masisirap iti lawag ti kinalatak ken pirak. Saan koma a maay-ayo iti nasasam-it a panagdildila dagiti tattao nga umas-asibay kenkuana. Dagitoy nga umas-asibay kenkuana ket kayatda laeng met ti diro iti kalakaan a panangala nga awanen iti pannakakagat iti uyokan iti mismo a balayna. Nakikiranod. Nakikiraod.

Tuladenna koma ni Dolphy. Ni Dolphy, maibilang nga institusion iti pelikula, a kas kenkuana iti boksing. Naraniag ti bituenna a kas kenkuana. Inawis met ti pulitika ni Dolphy. Saan laeng a diputado no di ket kas senador. “Ania koma iti aramidek iti senado,” kinuna toy komedi king. Ket kunaenmi met, “Ania koma ti aramiden ni Manny iti kongreso?”

Nagadun dagiti nalalatak a tattao a simrek iti senado ken iti kongreso. Ngem ania ti ar-araamiden dagitoy? Kamengda no di ket isuda iti dadaulo iti “Committee on Silence” “Committee on Props” wenno paspasurot nga awan man laeng iti mapanunot a linteg agsipud ta saan a ditoy a lubong ti pudpudno a lubongda. Ti lubongda ket makuna nga ‘ekspertoda’ ngem iti pulitika maibilangda a kas maladaga nga agkarkaradap a magna. Husto koma ti bilang dagitoy “props’ iti kongreso ken senado. Saan koman manayunan pay. Ti gobiernotayo kasapulanna unay dagiti competent government officials, uray no isu laengen metten iti pakonsuelo dagiti agbaybayad iti buis.

Isu a kunami, mangipatakder laengen iti foundation ken adu a gym a para kadagiti boksingero – dagiti agduyos, dagiti agen-ensayo ken lalona kadagiti retirado. Ad-adda a kasapulan dagitoy a kapadpadana iti dutdot. Laglagipen koma daytoy a pagsasao: “No sadino iti yan ti apuymo, sadiay met ti yan ti lawagmo.” ###

No comments: