Sunday, August 17, 2008

Ti kari a naisurat iti rabaw ti danum

Iti naminsan, nagkarin a saanen nga agtaray a para presidente iti mismo a sanguanan ti monumento ni Dr. Jose Rizal iti aldaw a panangselebrar iti kaaldawan iti pannakaiyanak ti nailian a banuar, ngem saan a natungpal dayta a waragawag. Isu nga addan dagiti wagaragawag nga agpatingga laengen iti waragawag ngem saan nga agmata wenno tumaud a kinapudno agsipud ta naisuratda laeng daytoy iti rabaw ti danum.

Naisuratda laeng iti rabaw ti danum, a kayatna a sawen a kalpasan iti panangiwaragawag agpatingga laeng dita ket akemna ti saanen a dumur-as wenno matungpal agsipud ta agpukaw metten daytoy a banag no di man malipatan wenno kas itay kunadan, a kari nga intayab ti kali.

Iti panagtung-ed ti adminstrasion iti Resolutiuon No. 10 a mangawag ti kongreso para iti Constituent Assembly a mangamiendar ti constitusion tapno maipagna iti panagbalbaliw ti porma ti gobierno a kas federal form of government ket saan a maikkat dayta dakkel unay a panagduadua a kayat laeng ti pangulo nga umatiddog ti panagtakemna. Saan a maikkat iti nalaus a panagduadua iti nalimed nga agenda iti kellaat nga iyaanamong ti administrasion kalpsaan a saan man laeng a pulos a naadakamat iti napalabas a SONA daytoy a tungtongan.

Nupay nainget la unay iti panangtubngar ken panangidarirag ti adminsitrasion nga awan iti kinapudno iti adda iti panunot dagiti umili a kayat laeng a paatiddogen ti pangulo ti terminona ket saan a maikkat gapu ta kasta man met laengen iti inkari ti pangulo a dina panagtaray iti iti eleksion kalpasan iti terminona. Ngem nagtaray. Naakusaran pay iti panagkusit. Saan laeng a bastabasta panagkusit no di pay ket dakkel a gerret dagiti umili iti namati itoy alegasion nga inna panagkusit iti eleksion.

Saan a maikkat kadagiti umili a saanda a mamati iti naibaga ta napasamaken dayta iti kallabes. No maysa a koma a tina a nangisit dayta a kari ket naisuyat iti nakapudpudaw iti purawna a tisiert ket namantsaanen. Napellasanen iti kinasayaatna. Namantsaan metten ti isip ken panunot dagiti umili gapu iti kallabes a napasamak. Ti mantsa ken mantsa.

Saan a dagiti umili iti nanginaw ken nangipasngay iti saan a panagtalek. Saan nga isuda a mismo iti nagtaudanna no di ket nagtaud a mismo iti pangulo kadayta a biddut a pannanganna iti bukodna a sao. Isu a mismo iti nangkali iti nalawa ken nauneg nga abut nga isu a mismo iti maikursong iti inna pannnagna. Isu a mismo iti nangipallangatok ngem ti bato nagdisso a mismo iti ulona met laeng.

Iti 2008 SONA, kuna ti pangulo, "For the remainder of my term until I step down in 2010, the best thing we can do is to stay focused on economic reforms, while providing peace, order and stability." Kasta man met laengen iti inkarina iti sanguanan ti monumento ti nailian a banuar ngem dina tinungpal. Ulitenna manen daytoy, a dina tinungpal ken saan a naikankano ti signipikante ti nailian a banuar iti insawang, kasano ngarud nga ibaga manen iti pananamati dagiti umili iti kasta a waragawag? No sibibiag ti naiklian a banuar, sigurado la ketdi a nakamisuot kadaytoy a banag gapu ta naaramat laeng isuna a kas paganodan iti kabukbokodan a panggep.

Ti makunami, nasaysayaat iti aramid ngem ti sao. Aramid ti pakakitaan.

No maminsan, iti ngiwat ti maysa a tao iti inna pakabasolan ta maikaglis no kua ti saan a nariendaan a dila. Ngem iti di panangrienda ti dila iti ibagbagana, ditoy met a manguram iti kinaasino. No ania iti imbaga, tungpalen tapno dagiti tattao inda agraem. Ti tao nga addaan iti maymaysa a sao itandudo a mismo dagiti saona…#

Isu a nasaysayaat nga agtrabaho koma ni PGMA ken ti gobiernona ngem ti sao a sao.##

2 comments:

Anonymous said...

pipia pay ket ngarud ni chavit a ta saan a mananao. ngem tay kunanan no awan maibaganan,aramid pakakitaan,kunanan a ta awanen ti makali ta otekna nga ibagana.ado met piman ti makita a waiting shed a namarkaan iti "DONATED BY:LUIS CHAVIT SINGSON".pagaayatna dagita a project aglalo no ta igid hi-way.hehe kaka.ty chavit iti aroda-ed ti bagas ti juteng.naposkol ti rupa dagita a politiko ta uray nagdadatan a loklokwenda ti tao ket natangarda pay laeng met.no idiay japan dayta a ket nag-suicide dan ta didan maawit babaindan.ngem ni gloria,ay apo kaka masemsemak,masoronak no kasdiay nga agsarsarita.ta uray aniat kunakunana,saan a maikkat dita recordna iti inna panangloko iti intero nga omili.helo helo helo...

NeoValdez said...

Amen iti dayta nga insuratmo, manong Jimmy. Mamatiak iti kunkunada a ti nangrugian ti lunod ti administrasion ni GMA—lunod kunada ta adun ti inaramidna wenno dina inaramid a pagrebbengan a nangitalmeg kadatayo iti nakarkaro a rigat—ket isu ti panangtalikudna ti inkarina iti sanguanan ti naidaklan a monumento ni Rizal. Nupay mamatiak met a saan amin a gundaway ket tungpalen ti maysa a kari no ad-adu ti pagsayaatanna no talikudan daytoy, sabali iti biang ni GMA ta nadakdakes met ti epektona. Kitaem man laeng ti inaramidna a kapalpalkan mainaig iti saritaan iti kappia idiay Mindanao. Tsk! Tsk!
Wen gayam, manong, in-linkko ti blogmo ken uray pay ti Tawid Magazine iti inrubbuatko met a blogko. Bumisita kayo met ditoy no maminsan: ansi-neovaldez.blogspot.com