Tuesday, June 10, 2008

ESSAY

Libre plete, $400.00 pocket money nga agpa-Hong Kong, kayatmo?

Iti kinarigat ti biag iti agdama a nasken a makilinnetletka iti nakaat-atiddog a pila iti agarup tallo nga oras sakanto makagatang iti tallo a kilo a bagas, makagargari ti diaya nga ipapan sadiay Hong Kong: libre ti plete iti eroplano agpapan ken agawid, adda US$400.00 a pocket money ken tiansa nga agsapul iti trabaho.

No adda immasidegka kenka, ket kastoy ti indiayana, addaytan ti round trip airfare ticket ken kuarta a doliar, mayatka kadi?

Makapamulagat ti doliar, saan? Dagiti dadduma, inlakoda ti daga wenno ti nuang wenno immutang kadagiti Bombay wenno asino la ditan nga agpatubo iti nakadakdakkel tapno laeng adda gastosenda nga ag-Hong Kong, idinto a libre ken adda pay ti kuartam, siggawatem la ketdi nga insegida ti awis.

Ngem no kastoy ti diaya, kailian, agpanunotka koma. Saanka nga agdardarasudos. Dika paallilaw. Nasken nga aramatem dayta utekmo, saan ketdi a dayta mulagatmo a mangmulmulengleng iti libre a ticket ti eroplano ken dayta doliar. Saanka koma a kellaat nga agwen ket dagdagusem ti agsukat lattan.

Napeggad la unay daytoy a diaya, kailian. Kastoy ti kabaruanan nga aramid ti sindikato ti droga a nangrugi sipud pay idi 1996. Adda para rekrutda ditoy pagilian nga agawis siempre iti mapan sadiay Hong Kong a libre ti pasahe ken adda balon a kuarta a doliar. Siempre, adda kasukatna dayta, ti panagawitmo iti naibag a droga. Kunwari paw-it. Siempre, dika makaliklik ta no addakan idiay eropuerto, ibaga ti rekruter nga adda awitem a dua a bag. Addanto sumabat kenka sadiay Hong Kong a mangala kadayta a bag. Kasta laeng ti kalakana. Siempre, bitbitem ta pawit ngarud. Kababain, kunam iti bagim ta tinulongannaka, dayta laeng dua a bag a paw-it, dimo ketdin kabaelan nga awiten?

Nalabit a maayatanka pay ta adda sumabat kenka idiay Hong Kong . Ngem no ammom la koma a droga ti awitmo, agpigerger la ketdi dagita lalaemmo!

Saanka a paallilaw iti kakastoy nga awis, kailian. Iti Cordillera, piton a babbai ti nabiktima iti kastoy a modus operandi ti sindikato. Babbaida amin ket addadan nga agpaspasanaang iti pagbaludan sadiay Hong Kong kalpasan a natiliwan a droga gayam ti awitda. Ania ngay ngarud ita ti maaramidanda? Appigud met ngarud ti gobierno a mangtulong iti asinoman nga addaan iti kakastoy a kaso. Saan met a mapabasol ti gobierno wenno dagiti agrebbeng no agsuspetsada a kamengka a talaga iti sindikato. Uray ngata no isangitmo iti dara a nabiktimaka laeng, saan a bastabasta ti ibaballaet ti gobierno agsipud ta adda sinalungasingmo a linteg, iti man China ken iti pagiliam.

Ania ngarud ti kasayaatan nga aramidem?

No adda agrekrut kenka, kailian, a kastoy ti ibagbagana a libre pasahe ken pocket money, saanmo nga awaten dayta a diaya. Dika paallilaw. Lalo no de-pamiliaka wenno babassit pay dagiti annakmo. Saan laeng a Hong Kong wenno iti pagilian a China ti awis no di pay iti sabsabali a nasion.

Agingga nga adda dagiti nalaka a maallilaw, saanto nga agpatingga nga agaramid iti saan a nasayaat dagiti manangallilaw a tattao. Santo la agsardeng dagiti manangallilaw no awanen ti mabalbalatongda. Gagangay unay a pagaramidanda iti panangallilaw dagiti lugar a yan dagiti tattao a maliplipit wenno talaga nga agkasapulan la unay iti pannakaipangato ti panagbiagda.

Talaga a makapatilmon ti diaya ngem saanka koma a paallilaw, kailian. Agpanunotka nga umuna sakbay nga agwenka iti kastoy nga awis. Awan koman ti mainayon kadagiti pito a babai a taga-Cordillera a naibalud gapu iti kastoy a panangallilaw.

Agbalin koma a palagip wenno pagpampanunotam ti nakas-ang a napagteng dagiti nabiktima ti panangallilaw.#

2 comments:

brainteaser said...

Hello, Manong.

Tsk. Makapawingiwing met daytoy! Wen, agpayso, talaga met nga adu ti kumagat no kastoy ti diaya. Nangruna ket nagrigat ti biag ditoy Pilipinas.

But then, kunada ngarud, if it's too good to be true, it probably isn't true.

Pakaadalan/pakapalagipan daytoy a poste. :-)

Sherma E. Benosa

Ka Iddo said...

ala ngarud a, atorni...

naladaw man, kongrats iti panangabakmo iti sarita... sunotam a!