Sunday, June 08, 2008

Editorial

Ti Libel Case


Daytoy ti maysa kadagiti kangrunaan a lapped dagiti kameng ti media tapno inda agirakurak iti kinapudno. Daydiay panagsao iti pudno ket tumutop koma a tumakder iti amin a balido nga isyo a mitsa iti pannasolbar ti tumaud a parikut no did man ti timmaud a sakit ti gimong ngem gapu daytoy a lapped timmaud limtuaw met kadagiti kameng iti gudeng lalo kadagiti adda iti babassit a poder wenno dagiti addaan no dipay ket awanan iti natugawanna iti agrakrakaya a gimong.

Saanen a mabilang dagiti kameng ti media iti simmango iti defamation case. Iti print ken broadcast media media, ad-adda a sumangoda iti libel case, a maysa kadagiti rupa ti defamation. Ti maysa pay a rupa daytoy ket ti slander. Maysa met a rupa iti panangbusal ti ngiwat ti libel case.

Iti agdama, sisasango ni Alexis (Alexander) Adonis, kameng ti broadcast media sadiay Davao iti kaso ti libelo. Iti radio, inwaragawag ni Adonis kadagiti serie ti komentariona a maysa a kongresista iti timmaray a labus iti maysa kadagiti hotel iti Davao gapu a ta nasukalan ida ti mister ti ‘nobiana’. Indarum ti kongresista ni Adonis iti libelo kadagiti komentona, ta maipagarup nga isu iti madakdakamat iti Davao Burlesque King Scandal. Napaneknekan a nagbasol iti korte ni Adonis, immawat iti parol idi Pebrero ngem saan a dagus a makaruar ta sabali manen a libelo iti naikaso kenkuna, nga ita ket ti met ‘nobia’ ti nagdarum. Nupay nagpiensa ni Adonis saan a mapalubosan a rumuar itri pagbaludan. Kinondena dagiti ganggannaet a media, ti Reporters without Borders ken local a grupo dagiti media, ti National Union of Journalists of the Philippines ken ti Center for Media Freedom and Responsibility ti kaso ni Adonis, ngem nakaserra dagiti lapayag dagiti maseknan.

Iti sabali pay a kaso ti libelo, innem a bulan agingga iti dua a tawen, ken panagbayad iti 5 a million a moral damages ken P33,732 for civil damages iti Carpio Villaraza and Cruz (nga itan ket Villaraza, Cruz, Marcelo and Angcangco) law firm iti nayetnag a pannanusa ni publisher ken Editor in Chief ti Daily Tribune Ninez Cacho-Olivarez.

Agpada dagiti dua a kaso a dinungparda ti pader a dakkel, ket gapu ta babassitda ken awan iti dakkel a tugawda, isu ngata ti puon ken gapuna a saanda a naiggaman ti balligi ken saanda a naiggaman ti lawag ti rinugianda a panggep? Kasano wenno ania koma no ti sinarida nga alad ket dagiti laeng gagangay nga awanan kapet, nabaddekanda koma ti tugotda iti agdama?

Kalpasan iti nagsasaruno a pammapatay iti naglabas a tawen kadagiti kameng ti media, ken naginana (ngata) daytoy kalpasan a nagsagrap ti pagilian iti a pannakaumsi iti sangalubongan, sabali manen ita a bangungot ti sagrapen dagiti katrabaho. Sabali manen a sangoen a busor ti panagserbi.

Awansa metten iti panagpatingga iti panagdadael kadagiti nasayaat a panggep ken pudpudno a panagserbi? Apay a saan laeng koma a panagpapatas iti maisarwag iti panggep tapno tumaud iti napudpudno nga ingpen a dur-as ken annayas iti panagbiag?

Awan iti an-anakenmi itoy a sinurat, ngem saan a solusion wenno sungbat ti dur-asan dagiti libelo no di ket saan a panangited iti karbengan ti trabaho ket panangpungtil ketdi daytoy kadagiti panagpapatas a panirigan ken panagkita iti tungga ingpen.

Kalpasan kadagiti nakaal-alliaw a panagparti iti kapanagan, rumbeng laeng koma nga awanen iti sumaruno pay a bangungot a sangoen. Ngem apay a saan nga agpatingga ti panagbasnot dagiti bagiw kadagiti mulinaw a pampanunot?

No awan ti asuk, awan la ketdi ti uram. Saan nga agsao ti maysa a kameng no awan iti inna pagibasaran. Agsao ti kameng gapu ta isu daytoy ti pudno. Agsao ti kameng gapu ta trabahona iti mangited iti sadiwa ken tumutop nga impormasion. Agsao ti kameng gapu ta kayatna laeng a yetnag ti opinionna. Amin dagitoy a tallo a rason ket saanda a sakopen ti kaso a libelo. Amin dagitoy a rason ket balido a mailaksid iti nasao a kaso.

Ngem iti kaso dagiti addaan iti bassit no dipay ket awan iti tugaw ket ket nailaksiddansa metten kadagiti di magaw-at nga anus ken pannakaawat? Sadino ngarud koma iti pagturongan ti gimong no lapdan dagiti tumakder a mangibangon ken mangdillaw iti inna panagrakaya?

Ingpenmi laeng a saan koman nga umadayo ti naisarwag nga addang kontra dagiti mulinaw a panggep, isu a kondenaenmi dagiti panagpungtil kadagiti nagtured a simmulbod…#

No comments: