Sunday, April 06, 2008

Tubera, Umuna iti 10th AMMAFLA

Inyalat ni Rolando D. Tubera ti Balioeg, Banna, Ilocos Norte ti Umuna a Gunggona iti Salip iti Sarita Para Kadagiti Agdadamo a Mannurat ti 10th AMMA Foundation Literary Awards.

Pinangabak ni Tubera, mangisursuro iti Banna National High School, ti saritana a “Burrarawit”. Maipaayto ken ni Tubera ti Sertipiko ti Pammadayaw ken P10,000 a cash prize iti pammadayaw a seremonia para kadagiti nangabak iti nasao a salip bayat ti Maika-40 a Komperensia Nasional ti GUMIL Filipinas a maangay inton Abril 18-20 iti Francisco L. Dy Coliseum, Cauayan City (Isabela).

Dagiti kadua ni Tubera a nangabak:
Maikadua a Gunggona (Sertipiko ti Pammadayaw ken P8,500.00): Sherma E. Benosa ti Bambang, Nueva Vizcaya, babaen ti saritana nga “Alona”. Madama a sursuratenna ti thesisna para iti kursona nga MA Language Education iti UP Diliman a nagturposanna iti BA Linguistics idi 1999; ken Maikatlo a Gunggona (Sertipiko ti Pammadayaw ken P7,000.00): Juviluck Ramos Basug ti Tuguegarao, Cagayan babaen ti saritana a “Ti Sagut ni Tatang”; katurturposna iti Computer Science itay Marso iti College of Mary Immaculate, Bulacan.

Napili dagitoy a Top 3 a sarita manipud iti 19 a sarita a naisalip.
Naluktan ti salip idi Disiembre 1, 2007 ken naggibus idi Pebrero 29, 2008 para kadagiti agdadamo a mannurat ti BANNAWAG (awan pay naipablaakna a sarita iti nasao a magasin; no adda man, di nasursurok ngem tallo agingga iti Nob. 26, 2007 a bilang ti nasao a magasin).

Dagiti naghurado: dati a Literary Bannawag Jose A. Bragado, agdama a Literary Editor ti Bannawag Juan Al. Asuncion, ken Noli S. Dumlao, National Commission for Culture and the Arts Radio-Media Coordinator.
Dagiti mangimatmaton itoy a pasalip: Amado I. Yoro, Mario Orbito, Mike Ulibas, Alfredo “Fred” Quibol, ken Francisco T. Ponce (agpapada nga agindegen iti Hawaii (Manipud iti email ni apo Amado Yoro)

No comments: