Friday, March 07, 2008

Ti Kalidad ti Edukasion iti Pinas

Saan a mamingga a diskusion ti maipapan iti edukasion. Nagadu dagiti wagas ken kapanunotan no kasano nga idur-as ken ingato ti kalidadna a kas iti kidkiddawen ti sangalubongan a merkado ti trabaho. Saan a met ngarud a masirip iti husto a tun-oyen ti kalidad a makunkuna tapno nalaklaka a targeten ken danonen iti dinno a lubong ayanna.

Ta ania ti makunkuna a nangato ti kalidad nga edukasion?

Ta ania met ti makunkuna a nababa ti kalidadna nga edukasion?

Nalabit a maymaysa ti sungbatna dagita a dua a saludsod. No ti kita ti edukasion ket saan a mabalin nga isangdo wenno ilaban iti nainlubongan a merkado; ken mas lalo payen no daytoy ket reject pay para iti bukod a pagkasapulan wenno kasapulan iti lokal, makuna dayta a saan a nakaragpat ti standard ti edukasion nga awit ti nagraduar.

Ti de kalidad nga edukasion ket iti uray sadino a papanan ket tumakder daytoy iti kaadduan. Saan a paatiw no di ket rumimbaw iti amin a kanito ken panawen. Ti de kalidad nga edukasion ket agtultuloy a proseso wenno saan a mamingga nga agpidut ken mangammo kadagiti kabarbaro a banag a mangnayon iti linaon nga ammo.

Ngem kasanon no adda dagiti nanglinteg iti inda panangragpat ti edukasionda?

Kas koma iti ginatang a dissertations, theses, term papers, essays ken dadduma pay a katuladna a proyekto iti eskuelaan. Ala, ket saantayon nga iraman ditoy dagiti ginatang a grado lalona ti ginatang a diploma wenno dagiti nagtaud ti Recto University.

Panagseserra manen ti klase. Kadagitoy nga aldaw ti panagaaramid kadagiti reports a kas iti nadakamat. Ngem rumbeng kadi nga ipaaramid iti sabali dagitoy a dissertations, theses, term papers, essays ken dadduma pay a rekitos ti asignatura wenno ti panagraduar?

Mayat man ken saan ti kaadduan, iti sistema ti edukasion ti pagilian, adda dagiti magatang wenno ipapaaramid ti estudiante a dissertations, theses, term papers, essays ken dadduma pay a katukadna nga project iti eskuelaan. Nasaknap la unayen daytoy. Nabayagen daytoy a mapaspasamak. Kinasadut ti estudiante. Saan la ngata a kinasadut no dipay ket kinaawan iti interestna nga agaramid wenno talaga ngatan nga awan iti ammona wenno awan iti simrek kenkuana nga adal.

Ti rigatna ket apaman a nagraduar ti estudiante a nagpaaramid kadagita a rekititos, inton nakastrek iti trabaho, saanna pay nga ammo dagiti porporma dagiti naduduma a kita ti sinurat. Saanna nga ammo iti agsurat iti gagangay laeng nga essay wenno saanna pay a nga ammo iti agsurat iti simple laeng a damag.

Itoy a punto, bimmaba ti kalidad ti edukasion a naikawes iti nagpaaramid. Sino iti akimbasol?

Ti Senate Bill 2053, wenno ad-adda a maawagan iti “Academic Honesty Act of 2008” a madama a maad-adal ken maipagpagna tapno agbalin a linteg iti pagilian.

Ta ania aya daytoy nga Academic Honesty Act?

Panangiparit iti panaglako ken panaggatang kadagiti dissertations, theses, term papers, essays, reports, research ken kanaig a projects kadagiti estudiante.

Rumbeng laeng saan kadi?

No agtultuloy ti panaggatang ken panaglako, lalo met a bumaba ti kalidad ti edukasion ti pagilian.

Nababa ketdin a, dayta multa PhP10,000.00 ken pannakaibalud kadagiti naduktalan a naggatang ken kasta metten iti naglako.

Ti academic achievement ket nakapatpateg a banag iti pananggun-od iti ar-arapaapen a trabaho, nangato a sueldo wenno pannakastrek kadagiti nalalatak a pagtrabahoan a mangit-ited iti nangato a pasueldo ken adu a benepisio.

Ngem kasanon no ginatang dagita nga academic achievement?

Kadagiti napalabas a dekada, kalakaan amin a pakaaalaan iti masters degree ket maipapan iti field of study iti literature. Adu dagiti ready made a para itoy. Adu payen dagiti nasurat nga artikulo a mabalin a tuladen wenno yesmagel lattan. Ngem kadagitoy a panawen, manmanonsan ti eskuelaan a mangayat a ti litertature ti field of study iti masters degree. Hmmn...

Iti napalabas a symposium a dinar-ayak, ti “IT Today” panangammo ti kasasaad ken pagturongan ti information technology iti agdama ken ania dagiti lapped ti naannayas a dur-asan.

Dagiti lapped ti naannayas a dur-asan ket nadakamat ti “poor use in English” ken ti kinakurang ti ammo dagiti nagreduar.

Ti poor use in English ket saan laeng nga IT ti agparikut itoy no di ket dagiti sabsabali pay a kurso.

Dayta kinakurang iti ammo. Saan laeng met nga IT. Sapasap latta daytoy. Ngem ti ad-adda nakaited ti immatangko ket iti natangken a panangisawang ti resource speaker iti Iluko, a kunana: “Saanyo a gatangen a, dagita theses ken dissertationyo! No diyo aramiden a mismo, dakayonto met laeng iti aglak-am no addakayonton iti trabaho a diyo ammon iti kudkuditenyo.”

Iti IT, simple laeng met dagiti theses ken panangdependar wenno panangipresentar daytoy babaen iti Power Point Presentation. Uray met kadagiti sabsabali pay a kurso. Dayta laeng a, no nasadut nga agaramid ti estudiante wenno talaga a dina ammo ti agaramid iti thesis wenno presentation ket gatangenna laengen, santo nagsao, nagdependar. Ania ngarud namnamaem ita a kalidad ti edukasion a naragpatna? Inton adda iti trabaho ket pagaramidenda iti technical writing wenno ania la ditan a sinurat, kasano ngarud nga ammona ti ar-aramidenna?

Ti de kalidad nga edukasion ket adda met laeng iti ima a mismo dagiti estudiante a saan laeng a kadagiti mannursuro. Ad-adda nga adda kadagiti estudiante. No saanna (estudiante) nga aramiden dagiti rumbeng nga aramidenna ket ipatulokna lattan kadagiti ginatang ken ipapaaramid, itedna met daytoy a factor iti panagbaba ti kalidad ti edukasion ti pagilian.

Ket ti Senate Bill 2053 ket rumbeng laeng a suportaran no kayat nga itag-ay ken padur-asen ti kalidad ti edukasion ti pagilian. Ta amangan no addanto manen nalatak a programa ti telebision a mangibaga a ti pagiliantayo ket maysa a diploma mill… ##

1 comment:

marry said...

Blogs are so informative where we get lots of information on any topic. Nice job keep it up!!
_____________________________

Dissertation Proposal