Saturday, February 23, 2008

Nananam ti Ubbog

Nananam ti Daniw-Ubbog




Ubbog. Danum manipud iti barukong iti ina a daga. Mangited iti bang-ar ti barukong. Lalo na kadagiti napaksuyan ken makaturturog a rikna, kultura ken kannawidan.

Dati awan ti ubbog. Ngem kalpasan iti lima a tawen sakbay a naikkan iti importansia, nanamen ti danum nga agpusuak kenkuana. Naipasngay idi 2003 babaen iti maysa a Poetry Reading iti UP Baguio.

Ti ubbog ket grupo dagiti estudiante iti UP-Baguio a mangitantandudo iti rehionalismo wenno kadagiti daniw-amianan. Nababagas ti mensahe dagiti daniw-amianan: Iluko, Nabaloi, Pangalatok, Kankanaey, Bolinawon ken Zambal. Saan a makieme wenno overacting wenno managinkukuna dagitoy nga agtutubo a mannaniw. Impeksada ti riknada babaen iti bukodda a dila. Siempre, saan a paatiw dagiti Saluyot. Rimmimbawda ketdi. Makapabang-ar iti rikna, nga adu pay laeng kadagiti agtutubo nga agduyos ken mangilala ti dandaniw.

Ti napasamak a Poetry Reading idi Pebrero 20 itoy a para iti National Arts Month nga inesponsoran ti National Commission on Culture and the Arts, UP Baguio Committee on Culture and the Arts (NCCA) ken ti Baguio Writers Guild ket intandudona ti laing ni Ilokano iti panagdaniw. Diak a ninamnama, ti laing dagiti estudiante nga agdaniw iti saluyot, lalona kada Juneley Lazaga (i-Tagudin, IS) ken dagiti kakaduana.

Iti pammaliiw ni Djuna Alcantara, publisher ti magasin nga AWARE, a dimmar-ay met a nagpaliiw kadayta a pasken, a dina ninamnama a dagitoy nga estudiante iti UP ket agdandaniwda iti Iluko. A nalaingda nga agdaniw iti bukodda a dila.

Iti mensahe ni Mylene Urriza, representante ti NCCA a nangsaksi ti pasken, nasken iti pannakapromot ken panangibayog kadagiti kannawidan ken kultura a pakairamananen kadagiti daniw-amianan. Naragsakan a nakangngeg kadagiti daniw-amianan. Ket insingasingna iti pannakailibro dagitoy a gapuanan dagiti agtutubo.

Ti pasken ket kanayunan metten para iti selebrasion iti tinawen a Panagbenga Festival ti siudad, Karaman ditoy ti pannakaiyalnag ti ti libro a “Womb of Water, Breast of Earth” a nangabak iti 2003 NCCA Writer’s Prize para iti epiko.

Karaman dagiti estudiante ken toy nagsurat a nagdaniw da Elizabeth Lolarga, Francis Macansantos, Mercie Dulawan, Elizabeth Caliwanagan ken Priscilla Macansantos, agpapada a mangisursuro iti UP Baguio . #

No comments: