Tuesday, April 03, 2007

Kararag

Mamamatika iti Bileg ti Kararag?

Saankon a saludsoden no ania ti relihionmo, kailian, ta ti importante kaniak ket no patiem ti kararag wenno saan?

No dika mamati, nasken a mamatika itan. Patiem daytoy ket dakkel la unay iti pagbalbaliwan ti biagmo.

Ta ania ngamin aya ti kararag? Ti kararag ket pannakisao ti maysa nga indibidual iti Namarsua. Mabalin daytoy ket agyaman iti parabur a naited kenkuana, agkiddaw iti tulong: pannakaiwanwan, pannakasaluad, pakaisalakanan ken dadduma pay.

Adtoy ngarud, kailian, ti maysa a pakasaritaan ti maysa nga agtutubo a mamati la unay iti kinabileg ti kararag, ni Belinda.

Addan iti maikatlo a tukad ti sekundaria ni Belinda. Masirib nga agtutubo ta adda latta a kanayon isuna iti honor roll iti klasena.

Tunggal malem nga aggapu iti eskuelaan dumagas iti simbaan tapno agkararag, agyaman iti Namarsua iti parabur a naawatna kadayta nga aldaw. Masipngetanton no agawiden daytoy iti lugarda, iti maysa a kabarobarongan a lugar iti siudad. Nanumo laeng ti pamiliada. Ket tapno makainut, pagpagnaenna ti agtallo a kilometro manipud iti downtown agingga iti lugarda.

Umuna a Biernes ti bulan. Nasipngetan ni Belinda a nagawid ta, a nakimisa pay. Iti pannagnana iti nakipet, nasipnget nga eskinita nga agturong iti balayda, simken kenkuana ti danag. Naynay ngamin a mapasamak ti holdap ken panagabuso dita nga eskinita. Ngem iti kinabayagnan nga agaw-awid iti minalem ken rabii, awan pay laeng iti napadasanna a kinadamsak. Ta no sumreken dita ket irugina metten ti agkararag kabayatan iti inna pannagna.

Iti dandani ungto ti eskinita idi kellaat a nagtibbayo. Adda ti mariparna a lalaki a nakatakder iti tengnga ti dalan a kasla agur-uray iti biktimaenna.

“Jesucristo, apok ken Diosko, isalakannak koma no adda ti pagpeggadak,: inkarkararag ni Belinda. Pinakiredna ti pakinakemna ket saan a naggudeng a nagna.

Maasitgannan ti lalaki. Ngem intuloy latta ni Belinda ti nagna, kabayatan iti inna panagkararag. Nasdaaw pay idi nagpaiigid ti lalaki, ket nasiputanna pay iti panangikupin daytoy ti batangas knife.

Kabigatanna, nagdinamag iti lugarda ti kinaadda ti narames, naholdap ken napapatay iti lugarda. Iti yan ti eskinita.

Nagtibbayo ni Belinda. Maikaliman dayta a biktima ti reyp iti dayta nga eskinita.

Kamalmanna, a naggapu iti simbaan kalpasan ti klasena, kellaat lattan a simmeksek iti panunotna a mapan iti presinto ti polisia. Imbagana nga adda ti nakitana a lalaki iti ilalabasna idi sumipnget.

Impakita dagiti pulis dagiti ladawan dagiti posible a suspetsada. Ngem awan kadagitoy ti lalaki nakitana kadaydi a sumipnget.

Nagpakadan ni Belinda. Rumuar koman idi nataldiapanna iti bulletin board ti ladawan ti maysa kadagiti maan-anup a nakalibas a balud.

“Sir, isu daytoy!” kinuna ni Belinda.

Kabigatanna, napasamak ti saturation drive iti sibubukel a kabarongbarongan a lugar da Belinda ket natiliw ti nakalibas a balud. Inamin ti lalalki nga isu ti akin-aramid kadagiti nagsasaruno a reyp, holdap ken pammapatay iti daydiay a lugar.

Nagregget ni ni Belinda a kasao ti lalaki iti pagbaludan.

“Wen, mairupaanka!” kuna ti lalaki ken ni Belinda.

“Agyamanak ngarud ta saanak a dinangran kadaydi a gundaway, “ kuna ni Belinda.

“Kasano koma a dangranka? Ket no dua a nagtatayag ken nagbabaneg a lallaki iti nangbayabay kenka!”

Nagtibbayo ni Belinda. Awan ti kadduana idi. Ngem apay nga ibaga ti lalaki nga adda dua a lallaki a nangbayabay kenkuana?

Nataldiapan ni Belinda ti agbitbitin a krusipiho ti sangkauggorna a Sto. Rosario ket nalimed a nagyaman. ###


Link

Monday, April 02, 2007

Mamatikayo iti Milagro?

Mamatikayo iti Milagro?

Inaldaw-aldaw nga adda ti milagro. Kinapudnona ket ti pudno a makunkuna a milagro ket wagas a panangidanon ti Namarsua ti grasiana kadatayo. Wagas ti panangidanon ti Ayatna. Sadinoman ti ayantayo. Peggad man wenno talna.

Adtoy man ti maysa a pakasaritaan ti maysa a milagro a dimteng iti maysa a biag. Makuna a nakaka-touch wenno kumulding iti rikna.

Maysa a makuna nga addaan iti mabalbalin iti biag dagiti ag-Buencamina. Negosiante dagiti agassawa. Addaanda iti tallo a lugan. Kumpleto ti alikamen ti balayda nga adda iti ekslusibo a subdibision a naiyapiring iti asideg ti bakud. Ti bakud ti namagsina ti daytoy nga ekslusibo a subdibision dagiti babaknang ken ti kaeskuateran a kabarongbarongan. Makuna nga adda aminen a nam-ay ken biag dagiti ag-Buencamina. Adaanda iti tallo nga annak: dua a lalaki nga agtawen iti 10 ken 8. Buridek ti babai nga agtawen iti 6. Kabbalayda ti balasang a kabsat ti ina. Adda met ti maysa a katulongda nga agtutubo. Ngem iti kinarang-ay ti biag ti pamilia, maysa laeng ti awan kadakuada. Dagiti agasawa ket saanda a mamati iti Dios. Maysada nga atheist. No saan a mamati dagiti agassawa iti kinaada ti Dios, natural a dayta ti insuroda kadagiti tallo nga annakda, saan?

Iti maysa a sardam, nalukag ti buridek, ti ubing a babai nga agtawen ti innem. Rimuar iti salas tapno kitaenna ti mapaspasamak. Ngem sakbay a makapag-ikkis ti ubing, adda ti nangapput ti ngiwatna, naawid iti suli. Naggulagol ti ubing, kayatna ti rumuk-at ngem saanna a kabaelan.

Bayat ti pannakaapput ti ngiwat ti ubing a babai, mabuybuyana, a parparigaten dagiti lima a lallaki dagiti dadakkelna, ti anti, dagiti kakabsatna ken ti katulongda. Nakaro la unay ti pannakadusa dagiti kabbalayna. Impilit ti ubing ti rumuk-at, ngem kuna ti lalaki a nangapput iti ngiwatna: saanka nga agtagtagari. Saanka a maan-ano agingga iggemka.

Pinatay dagiti lallaki dagiti dadakkelna, dagiti kakabsatna, ti anti ken ti katulongda. Nairupaan amin ti ubing a babai ti kinaasino dagiti lallaki. Nairupaan pay ti ubing a babai ti kinaasino ti lalaki a nangiggem met kenkuana. Saanna a nalipatan ti rupa dagitoy.

Iti imbestigasion ti polisia, naitudo ti ubing a lalaki dagiti lallaki a mannibrong babaen kadagiti retrato iti PNP file. Natiliw dagiti mammapatay a napeklan a kriminal. Maysa laengen ti saan pay a natiliw, ti lalaki a nangiggem iti ubing a babai. Isu ti pakakumikoman dagiti otoridad.

Naipasidong iti DSWD ti ubing a babai tapno aguray iti asideg a kabagianna a mangala kenkuana.

Iti maysa a guidance counseling iti DSWD, kuna ti maysa a counselor: “Asino ti makaam-ammo Isuna?” Intag-ayna ti maysa a dakkel a ladawan.

Dagus a timmakder ti ubing a babai ket kunana: isu dayta ti lalaki a nangtengngel kaniak idi sinerrekdakami dagiti mannanakaw!

Nagmalanga ti amin. Dandani naibbatan ti guidance counselor ti ladawan ti Sacred Heart of Jesus.#


Link