Friday, March 30, 2007

march30, 2007...
">Link

Saturday, March 24, 2007

Nolasco ken Hidalgo, keynote speakers iti 2007 Nakem Conference

Pagbuligan ti Ilokano and Philippine Drama and Film Program iti Unibersidad ti Hawai`i ken ti Mariano Marcos State University ti pannakaangay ken pannakaisayangkat ti 2007 Nakem International Conference. Maangay ti nasao a kumperensia iti MMSU Batac inton Mayo 22-25.

Ti Nakem Conference ket maysa a tignayan nga addaan panggep a mangisayangkat iti sistematiko a panagadal ken panagsukisok maipapan iti pakasaritaan, pagsasao, ken produksion a kultural dagiti amin a komunidad iti deppaarna iti Amianan a Luzon a pakaibilangan ti Kailokuan, Kordiliera, ken Tanap ti Kagayan.

Inrugi da Prop. Precy Espiritu ken Dr. Aurelio Agcaoili, agpada a mangisursuro iti Ilokano, literatura, pelikula, ken drama iti babaen ti Departmento ti Hawaiian and Indo-Pacific Languages and Literatures, Unibersidad ti Hawai`i iti Manoa, ti tignayan a Nakem Conferences a maysa itan a non-profit nga organisasion ken mangimatmaton met laeng iti pannakailungalong ti International Academy for Ilokano and Amianan Studies.

Kinabinnulig da Espiritu ken Agcaoili ti pannakaisayangkat ti immuna unay a 2006 Nakem Centennial Conference da Dr. Raymund Liongson iti Philippine Studies Program ti Leeward Community College, Unibersidad ti Hawai`i; Dr. Josie Paz Clausen, maysa nga iskolar iti Philipine linguistics a propesora met laeng iti Ilokano iti UH Manoa; Lydia Abajo iti Domestic Violence Clearinghouse and Legal Hotline-Pilipina Rural Project; Dr. Estrella Pada Taong iti business sector; Cynthia Ochoa, maysa a cultural worker iti Honolulu; ken Julius Soria ken Clem Montero, agpada a manursuro iti UH Manoa. Kinabinnulig met ti Nakem Conference Secretariat ti Timpuyog, ti asosasion dagiti estudiante iti Ilokano iti UH Manoa.

Iti diskursona kas plenary speaker, ibuksilanto ni madaydayaw a Dr. Ricardo Ma. Duran Nolasco, chairman ti Komisyon ng Wikang Filipino, ti pannakapreserba ken promosion dagiti literatura, lengguahe, ken produksion a kultural kadagiti komunidad nga awan iti sentro ti administration, komersio, ken edukasion—kadagiti komunidad nga adayo iti Kamanilaan.

Iti sabali a bangir, agsaritanto met ni Mr. Juan SP Hidalgo Jr., plenary speaker iti maikatlo nga aldaw. Maysa ni Hidalgo kadagiti kalalaingan nga Ilokano a mannurat ken translador. Maysa met isuna kadagiti finalists iti National Artist Award para iti literatura, maysa a nailian a pammadayaw ken pammigbig nga isaysayangkat ti Republika ti Filipinas ken mait-ited kadagiti artista a nakaiburay iti adu kananakem ken sirmatada iti panagsuratan. Manamnama a warwarento ni Hidalgo—iti Ilokano ken addaan iti pannakiyulog iti Ingles—ti personal a padasna tapno iti kasta ket mataginayon iti lagip ken iti inaldaw-aldaw a panagbiag dagiti kananakem, kultura, ken kur-itan dagiti makipagili iti Amianan.

Maisayangkat met iti nasao a kumperensia ti pannakaipasdek ti Nakem Conference country chapter ken ti International Academy for Ilokano and Amianan Studies-Philippine chapter.

Segun iti saritaan ti nagkadua a grupo ti MMSU, iti panangidaulo ni Dr. Miriam E. Pascua, presidente ti nasao nga Unibersidad ken ni Dr. Aurelio S. Agcaoili, coordinator ti program iti Ilokano, pelikula, ken drama iti UH Manoa iti administrators conference nga inangayda, a kaduada pay dagiti sabsabali nga administrador ti dua a nasao nga unibersidad iti arinunos ti 2006 iti UH Manoa, ti mapabaro nga Ilocos Research and Information Center ti nasao nga Unibersidad ti agbalin a country headquarters ti Nakem ken ti IAIAS. Kabinnulig ti MMSU ti UH iti adu a proyekto ken programa. Maysa kadagitoy a programa ti sistematiko a panakaadal ken pannakaitandudo ti kultura ken adal nga aggapu iti Ilokos ken Amianan.

Iti pannakaisayangkat ti Nakem Conference ken ti IAIAS a kas singin a tignayan, nakiramanen kadagiti immuna kolaborasion ti St. Mary’s University Research Center iti Bayombong, Nueva Viscaya; ti Pangasinan State University Graduate School iti Urdaneta, Pangasinan; ti Unibersidad ti Pilipinas iti Diliman; ti Unibersidad ti Pilipinas iti Baguio; ti University of Northern Philippines iti Vigan ken Candon; ken ti Don Mariano Marcos Memorial State University.

Maangay ti 2008 Nakem Conference iti Unibersidad ti Hawai`i iti Manoa ket iti met Unibersidad ti Pilipinas iti Baguio ti manamnama a pakaangayan ti 2009 Nakem Conference.

Para kadagiti manursuro iti eskuelas publikas ken pribado, nadawaten ti endorsement para iti daytoy a kumperensia iti opisina ni Sek. Jesli Lapus iti Departamento ti Edukasion ken ni Chairman Carlito Puno iti Commission on Higher Education.

Nagbunga ti 2006 Nakem Centennial Conference iti dua a libro a nakatiponan dagiti napili a salaysay dagiti iskolar ken ispiker: ti Saritaan ken Sukisok: Initial Proceedings of the 2006 Nakem Centennial Conference ken ti Nakem: Imagination and Critical Consciousness in Ilokano Language, Culture, and Politics.

Sinuportaran ti Filipino Centennial Celebration Commission ti napalabas a 2006 Nakem Centennial Conference.

Kadagiti cultural workers, iskolar, edukador, mannurat, ken mangil-ilala iti kultura, kananakem, ken kannawid dagiti taga-Amianan nga agngayangay nga umatendar, bisitaenyo ti conference website, philippinesonline.org/nakem2007 wenno agsurat kada: Dr. Alegria Tan Visaya iti MMSU, atvisaya@yahoo.com wenno Dr. Aurelio Solver Agcaoili, iti UH Manoa, nakemconference@yahoo.com.

Maipakaammo met a nalpasen ti pannakaawat kadagiti abstracts ket madaman ti deliberasion no ania dagiti conference papers ti maidasar iti nasao a kumperensia.

Maipakaammo met nga inton Abril 15 ti maudi nga aldaw ti pannakaawat iti rehistrasion. Mabalin ti agrehistro iti website ti kumperensia.

Makitinnulong ti Komisyon ng Wikang Filipino, Republika ti Filipinas ken ti Fil-Am Observer, warnakan iti Estado ti Hawai`i, iti pannakaisayangkat ti 2007 Nakem Conference.


Link

Saturday, March 17, 2007

TI AWIS TI TMI

immawag ni demi mauricio ket nagawis iti innak panaglektiur iti daniw iti mapasamak a tmi seminar sadiay isabela inton marso 29-abril1, ngem agsasaruno ti graduation dagiti annakko.. diak a kayat iti pumanaw kadagitoy napateg nga aldaw ti biagda... awan ti para luto ti saganada , kunada man, hehehe!

ladingitek unay iti panangpaayko iti awis.... adu pay met ti sumaruno a seminar..
Link

Sunday, March 11, 2007

Nakuyem Ti Tangatang Ita

Wen, Viriginia, adda pay laeng met a ti isisingising ti init. Apay ketdin a saanen? Saan nga agnanayon ket nakuyem ti tangatang. Sumingisingto latta met ti init, makitamto inton dumteng ti sirnaat. Saanka nga agbuteng iti idadateng ti sipnget, ta ti init ket agmulagat inton dumteng ti sirnaat.

Nasipnget dagiti isyu iti agdama. Ulsanda manen ti lubong. Ti narugit a pulitika ket kasla ulep a nangbalkot ti tangatang dagiti umili. Dugudog ti pangtana. Flash flood ket adu dagiti maiyanud iti di maiparbeng ken di umno no diman ket mairaman a madidigra dagiti inosente. Magaburan iti pitak dagiti rumbeng ken prayoridad koma nga aramiden para iti dur-asan ti sapasap. Maiyanud iti narungsot nga agus dagiti daan a kari tapno sumangbay manen ti sabali pay a kari no di man isu nga isu a kari. Saan a maliklikan iti pannakaipasir kadagiti buya a saantayo koma a kayat a mapasamak. Dagiti buya a saan koma nasken a mangkigtot ken mamutbuteng. Saan a maiparbeng a dagitoy ti maisubo ken maiduol kadagiti naganus pay nga isip. Ta ngamin no ania iti makita, isu met ti tuladen dagitoy a saringit. No makitada a nakaay-ayat wenno maayatanda la unay iti mapaspasamak iti las-ud a dida pay la maawatan ti kinapudno ken no matiliw ti interesda kadagiti pinniltakan iti rupa ken pinnabangsit ti nagan, di met masasaan nga aramidendanto met dayta a banag. Kaay-ayodanto daytoy. Agsipud ta dida pay maawatan dagita, agpisawpisawdanto, saandanto a mamingga a mangkutikot ti pakabuklanna, agingga nga agbalindanto met a tradisional a makibarbarsak, makipinnalapal. Maibilangdanto met a disipulos dagiti ubbaw a garakgak. Karamandanto kadagiti di makadlaw iti ilalabas ti lalaki a naamitan iti oras.

Wen, Virginia, nakuyem ti tangatang, lalo iti Mayo. Dumteng ti katawa dagiti nagballigi: dagiti tinalek ken intalek ken pinilit a tinalek; dagiti nagsaur ken nagaramid iti madyik tapno maguyodna a tugawan ti trono; naisem pay dagiti nakaliksab kadagiti nabagas unay: dagiti naugingan a nagiggem iti banga, dagiti nangilako iti anniniwan ti sabali, dagiti nagtured a nangallilaw kadagiti bullagaw.

Nakuyem ti tangatang ti sumungad a Mayo, gapu kadagiti saning-i dagiti saan a nagballigi: dagiti talaga a di kayat dagiti umili a pasalsali; dagiti mamati la unay iti bagina a maallilawna ti utekmo, Virginia; dagiti awanan iti karbengan nga agserbi ta makitan dagiti umili ti agsarsarwa a bulsada idinto ta agmalmalangaka pay laeng, Virginia, kadagiti naipuruak a kari; dagiti ikkis dagiti di makaawat ken dina kayat nga awaten nga isuna ket saan a nagballigi, ngamin, kayatna a subboten ti dakkel unay a nagastosna; dagiti mangipagarup a sinuitik ti kasalisalna. Manayunan manen ti bilang dagiti matmaturog ken binuot a kaso iti sala ni torogis, ken ad-adu manen iti makiraud a pagbagasan saan laeng a ti napno ti kamaligna no dipay ket makadkadan met ti agamang ti ili.

A, nakuyem ti tangatang ti Mayo ita, Virginia. Wen, makitam ita dagiti dagiti nasasam-it a dila. Makitam ita dagiti magmagna a bullagaw nga umasideg a kunam la no am-ammonaka: makilamano, makisarsarita, makiinnangaw ken makirikrikna iti agdama a rikriknaen. Umayda, wen, bumalaybalay, isuda dagiti balangkantis a propeta ta ti asukar nga agaon kadagiti bibigda ket agbalin nga apro apaman nga iti dilam ket naidisso. Umayda agwagis ken makilamano kadagiti kalkalsada: laglagipennakto, kayong; ne, kasinsin, dinakto liplipatan; dagitay inanaktan ti kasar ken buniag dita, kumpadre ken kasta met kumadre bagaam idan a didan isabali pay ti ikur-itda ta ad-adda datayo ti agsisinnaranay; anakek dayta ubbam ta kuak ti maysa a baboy ken agayabka iti ad-adu nga umay makipunsion; siak ti ninong (wenno ninang) ta iserrekonto ida no makatugawak. A, nagadu dagiti kari ken nagadu met dagiti agam-ampayag a kali.

Wen, Virginia, nakuyem ti tangatang ita, ket intay manen asaken dagiti kinelleng, ket intay manen pilien dagiti bin-I a kapkapnekan: dagiti bin-i iti nasiit ken nabato a daga; dagiti adda iti igid ti kalsada; dagiti nagtubo iti abay dagiti nadadangkaw a ruot. Isu a napateg la unay iti tunggal inka ikur-it: ta dayta ti masakbayam, ti dara ti ilim, ti pataw iti saanen a pannakalung-aw, urbon ti karnero a mangirugi iti nasged a panagbalbaliw saan laeng ti ili no di pay ket ulidan dagiti umili.

Saantayo koma a makiraman kadagiti makipagparti iti bukod nga ili: natingra dagiti dara, maitaray dagiti naalas-as a lasag. Saantayo a makipunsion kadagiti nangisit a gagem.

Wen, Virginia, sumirnaat pay ti init. Ngem nasken a utoben a nalaing ti konsensiam sakbay a mangikur-itka. Saanmo nga ilako dayta karbengam. Saanka a paallilaw kadagiti inasukarana balikas.

Nakuyem ti tangatang, lalona iti Mayo, ngem iggemtayo ti lampara ti masakbayan…#


Link

Thursday, March 08, 2007

Ti Ina Nga Ili, Inlansada iti Krus

Adu a panagilansa: binnaddekan iti ulo, nagduduma a turongen ken panangiwagayway iti kayat ken prinsipio ken kapanunotan agraman ti nagduduma nga ideolohia, kinaadu ti kumammet nga ima iti dipay naluto a saang, dagiti sarsuela ken moromoro iti entablado dagiti timmaud ken pinataud nga isyo, innem a million ti mabisbisinan a mapan agiskuela, immadu dagiti matmaturog iti bangketa idinto ta nabartekda kadagiti mansionda…a, adu ken adu a, dagiti lansa nga inda impalok iti padeppa ti ilida…

No makasao koma ni Ina Nga Ili, dagitoy la ketdi ti ibalikasna sakbay a magsatan:

1. “Ama, pakawanem ida ta dida ammo ti ar-aramidenda….” (Lucas 23:34)

Ekspertoda. Apay ketdin nga ibaga a dida ammo ti ar-aramidenda? Hello Garci. Fertilizer scam. Kanginaan a highway. Naglawagan a balse ti tokar, ngem agsalsalada iti cha-cha. Siputam ket nakammet manen ti coco levy fund. Sumagmamano laeng dagita a pakakitaan iti kinalaingda. Kasla abut nga awan ti patinggana dagiti bulsada. Iggemda dagiti ari-ari dagiti dingraw, isu a no agdiskursoda, palakpakanda met laeng ti bukodda a bagi.

Dida ammo ti ar-aramidenda? Wen, wen man laengen, ta pilitennak met la nga agwen, dida ammo ti ar-aramidenda ta dida ammo iti umabrasa. Dida ammo iti umno ken maiparbeng nga aramid. Dida ammo iti mangidaulo a kas pinusgan ti tao. Wen, dida ammo ti ar-aramidenda, ta sabali la ngarud a banag ti ekspertoda.

Nalaingda nga agdaniw kadagiti balinsuek a balikas. Makita isuda wenno ipakitada kadagiti tattao ti kinalaingda nga agkanta iti osana iti sango ti balinsuek a krus.

Nalaingda pay a mangiddep ti apuy ti lampara dagiti nagtagisilaw; ket iti amin a suli, nagsasaruno iti panagparti. Iti pagpartian; adu dagiti tinugawanda a balikas ti araraw ken saning-i ngem dida man la narikna ti bara iti ultimo kababattingan a panaas. Imkis ti lubong kadagiti panagparti ket imbayogda a sungbat ti kansion dagiti bambanti.

2. “Eli, Eli, lama sabachtani?” (Mateo 27:46)

Diosko, Diosko, apay a binaybay-am ti nakaiyanakak nga ili? Apay a pinalubosam iti inda panangilansa?

Ilansada dagiti imana tapno saan a makaanawa kadagiti aramidda. Ilansada dagiti sakana tapno saan a makataray nga agkamang kadagiti mangisakit kenkuana.

No maminsan, maawagan (pay) dagiti kuspag iti “mamasirib” ken kas idolo a kasukat ti pennek dagiti garadugod ti buksit. Ti ikakapet kadakuada ket napataud la ket ngarud ti kultura ti kinasadut. Kultura ti duol: nga anusan ti maipuruak a binuot a tinapa idinto ta kuskusayan dagiti dobermanda ti ham ken bacon. Nasipnget ti rupa ti ubing nga nagkalkalkal iti basura a mangbuybuya kadagiti agaayam iti golf; agpipinnatay dagiti nagipila kadagiti timba idinto ta pumpumsuak ti hose dagiti golf course ken iti panag-carwash. A, wen, mamati aya ti makunkuna nga agub ti aggargaradugod a buksit?

Wen, adda dayta kinamulagat: kinabullad, nakamulagat ngem di makita iti agdadata a sagmak ken pannakaikuspil. Anian a kinatadem ti utekda. Anian a kinalaingda…

Eli, eli lama sabachtani! Diosko, Diosko, apay a binaybay-am ti Inak Nga Ili?

3. Kinuna ni Jesus ken Maria nga inana: “Babai, adtoy ti anakmo.” Ket kinuna met iti adalanna (a ni Juan): “Adtoy ti inam.”(Juan 19:26-27)

Iti kambas a buya ti panawen, nagaatiddog ti ima a kimpet iti nakadakdakkel nga ima. Isuda dagiti kumammet iti panagkimar saan laeng nga iti kamalig no dipay ket dagiti nabangles a murkat a subo dagiti is-isemanda a dungrit. Nagpupuner dagiti ramramay a nangbekkel kadagiti imkis a kararua. Pinespesda ti dara a lua kadagiti kapanagan a sibug dagiti ay-ayatenda a masetas.

Ket kuna ti timek: “Babai, adtoy ti anakmo…” Nga isu met laeng ti nakalawlawag a kaipapanan ti “Babai, adtoy ti ilim…

Ket sinungbatan ti babai ti timek: “Adtoyakon Inak Nga Ili.”

Ket adda babai nga intag-ay dagiti nakaad-adu nga ima, ket pinisangna ti nangisit a telon ti pagbaludan. Ket simrek ti lawag ti namnama. Daydiay bannawag ket kinurnoan ti lubong iti apagkanito laeng. Kas iti panagtamed dagiti sabsabali a puli a managayat ti sinamar. Ay, wen, anian, nagimnasen a lang-aben ti puyupoy ti baro nga agsapa!

Ngem makakettang met gayam ti aguray iti dengngep dagiti kammuol iti rupa ken black eye ta awan met gayam ti nisnis a pangadaw ti bara ti nagpukaw nga atong. Makakettang met gayam dagiti adu a lualo ken kararag iti altar a matemtemtem. Saan a nakauray ti mabisin ket ad-adda la ngarud a nagbisinan iti saan laeng nga innapuy no dipay ket ti kararuana.

Ta idin ta nakatangkayagen ti init, makasineten ti darang ti agmatuon. Adda pay ketdin dagiti mabuya a panangipugsoda ngem iti uloda met laeng ti nagdissoan dagiti sarwada. Ne, apayen, ta naginumanda met laeng ti tinakaw a kopita

Isublida nga inwara kadagiti kalkalsada dagiti pinidutda a basura. Anian, ta awaganda ketdin a panangdalus ti pitakpitak a baboy babaen iti panangpuor kenkuana babaen ti sibubukel nga ubongna.

Dimteng latta dagiti nakaisigudan a buya ti panagilansa, a nalabit a tinawid wenno tinulad a berso ti daan a kapitolo. Copycat!

Ket ti sinamar ti baro nga agsapa, napukaw ti kaipapananna, dina madengngep ti malammin ken agpaypayegpeg a kararua.

Sabali man pay nga ina. Kasla dawat ti lucky nine, aya? Maminsan pay. Ngamin ina. Ina a nalabit a mangisalakan iti Ina nga Ili. Ta ina ngarud di ammona ti rikna ti maysa nga ina. Isu a impatugaw dagiti naawananen iti namnama. Ngem ad-adda ketdi ti pannakailansa, ta nabileg gayam nga anting-anting ti nagbiag a sallapiding iti pingping.

4. “Mawawak”(Juan 19:28)

Mawawak. Mawaw iti diro ti uyokan nga inugmokan dagiti kaarruba. Ta dagiti kuting idi a tinagtagibi isu met itan iti tigre a dumawdawatan iti duol ken mapanan pakidigoan kadagiti murkatda ken arasawada. Isuda dagiti kuting a nabalin a tigre. Ngem ti Ina nga Ili, isu ti tigre idi a nagbalin a mamirmiraut a kuting.

Mawawak. Makawaw a denggen dagiti paulit-ulit a misterio dagiti nangisit nga anniniwan. Awan ti kaipapanan dagiti litania ti salbar. Saanen a matay dagiti puraw a rabii.

Danum! Danum! Danum… Ngem dara ti diaya manipud iti tinakaw a kopita ti maisubo, nga inton makaanges iti apagamapan bayadan met laeng iti dramdram a dara.

Makawaw, makawaw ti panaguray iti panagsubli dagiti baliodong a panunot.

Awanen ti danum. Awanen ti mainum… Mawawak…!

5. “Ibagak kenka daytoy: ita nga aldaw, makipagyankanto kaniak idiay Paraiso” (Lucas 23:43)

Napasamak daytoy idi pinabpabainan ti maysa kadagiti kriminal ti nailansa nga ili, ket kunana pay: “Saan kadi a sika ni Cristo? Isalakanmo ngarud dayta bagim ket isalakannakami met!”

Ngem binabalaw ti kaduana a kriminal a nailansa: Kuna daytoy: “Awan kadi a pulos ti panagbutengmio iti Dios? Agpapadatayo amin a madusdusa. Rebbengna nga agsagabata gapu iti inaramidta. Ngem awan dakes nga inaramid daytoy a tao. Kalpasanna, kinuna ken Jesus, “Laglagipennak Jesus, inton umayka a kas Ari.” Ket insungbat met ni Jesus: “ Ibagak kenka daytoy: Ita nga aldaw, makipagyankanto kaniak idiay Paraiso.”

Wen, tumaud no kua dagiti di makabael a mangbuybuya iti Ina Nga Ili a nakabayog iti krus ket gamdenda nga isalakan. Mangirasda. Iwarasda dagiti lampara. Paraniagenda ti aglawlaw. Ngem maawaganda dagitoy iti kriminal.

Apay maibilang kadi a panagtakaw ti panangisubli ti kukua ti Ina Nga Ili? Kaano pay a nagbalin nga aramid a krimen ti panangalaw ti malmalmes? Kaano pay a nagbalin a krimen ti panangpadagus kadagiti naamitan iti dalan?

Pakanen dagiti mabisin, painumen dagiti mawaw, saan, aya?

Adu dagiti naawagan a kriminal a nangisalakan kadagiti agtutuok; a nangited kadagiti subo a saan laeng nga iti bituka no dipay ket ti utek. Adu dagiti nangriing kadagiti agam-ammangaw ken mabatbatibat.

Ngem kalpasan ti amin a gandat ti panangisalakan, napasagda nga awanan iti kalabanlaban iti pagbababakalan dagiti prinsipio ken mulinaw a keddeng.

Iti Brgy. Tablac, ti rangtay nabangon

nagamayan iti adu a dara ti pundasion

tapno natibker illusion dagiti gandiong

ken kurimaong iti matemtemtem a gimong.

Di mapnek panagparti dagiti kumaw

ta salaan ken kantaanda pay panaggamsaw

idatonda iti rangtay amin a nagtagisilaw

nasalawda ni Kapitan Berto ket nagpukaw!

A, ti silaw! Ti silaw, tinakkabanda iti salop. Nanglangeb ti aglawlaw. Immadu ti saibbek ken saning-i. Adda marka iti muging iti kuddot ti rabii.

6. “Nalpasen.” (Juan 19:30) Kalpasan a naramanan ni Jesus daydi naalsem nga arak, daytoy ti imbagana.

Nalpasen. Nalpasen a nailansa iti krus ni Ina Nga Ili. Ngem awan iti pannakalpas iti agnanayon a puni dagiti tiri. Adu ken adu a panagparti. Ta agluplupias met ket ti siliasi nga ikurkurimed nga ibay-on dagiti para luto iti kusina ken dagiti adda iti uneg ti kusina, segun dagiti tumanabutob a kaarruba. Ngem mapili dagiti mabsog. Ay, anian a abunaw ti sagana iti punsionan dagiti didiosen.

Nalpasen a nailansa ti Ina Nga Ili…

7. “Ama, kadagita imam, yawatko ti espirituk. (Lucas 23:46)

Ama, Ama a nainlangitan, yawatmi ti espiritu ti ilimi nga inlansada. Siksika laengen ti ammomi a kamangmi itoy a sagabami..

Adu dagiti nakasarukang nga atang a balikas a bayad dagiti nakailaw-anan, ngem saan a makapudno dagiti lualo ken panagbayad. Nabileg la unay dagiti marmarna ken dagiti nasalapon iti igid ti alad ken iti bunton ta nalibeg latta ti danum ti inanger a bagbagutot.

Nagibitin ken nangiplatito iti paradipad dagiti tawa, ngem saan a nagbuteng no di ket kinatawaan dagiti aswang dagiti pinitpit a bawang.

Sinippaw dagiti atros dagiti naiwarsi a bagas iti sumipnget. Inuttotan dagiti barkes ti kumalkalawikiw nga asuk dagiti anglem.

Napirpirsayen ti nagmurengan nga ibautbaut iti adigi, ngem di maalaw ti kararua ti Ina Nga Ili nga intubongda iti sangalawas a kawayan.

Wen, dagiti lallakay nagidulinda iti nagluposan ti uleg tapno lumukmeg ti pitaka. Naglabusda pay a nagitukit tapno nabungbunga dagiti mulada. Insapitda ti umuna a pukis ti buok kadagiti libro tapno masirib ti anak. Ammoda ti kaipapanan tunggal taraok iti parbangon. Iti laeng inda panagtangad, ammodan ti kaipapanan ti tayab dagiti ulep, ti kiray ken panagbabatog dagiti bituen, ti kuldit ti angin. Ammodan ti kaipapanan no nababa ti tayab dagiti tuwato ken panagpalaud dagiti kannaway, iti panagpasurong dagiti ipon…ken adu pay…

A, mamasirib dagiti lallakay, a saan a natawid dagiti kaputotan a nangilansa iti Ina Nga Ili… ##


Link

Monday, March 05, 2007

SOLID NORTH!!!

Nabileg Pay Aya Ti Solid North?

Solid North. Maysa nga Ilocano block. Kayatna a sawen ti panagkaykaysa dagiti amin nga Ilokano iti maymaysa nga itandudo nga ibutos.

Maysa a kultura ti solid north. Panagkaykaysa ni Ilokano, manipud iti rehion uno, dos, tres, Cordillera ken uray Kamanilaan ken amin a paset ti pagilian a yan ni Ilokano. Ta nagwaras met ni Ilokano. Sabali pay dagiti OFW ken dagiti agindegen iti sabali a pagilian.

Daytoy a solid north ket addan uray idi un-unana a panawen, uray idi panawen da Presidente Elpidio Quirino.

Idi panawen iti panagtakem ni Presidente Marcos, lalo pay a pimmigsa ti solid north, ket naaddaan dagiti nabibileg a politiko a kas kada Aspiras, Ablan, Albano, Agbayani, Cendana, Clave, Crisologo, Dupaya, Dy, Enrile, Estrella, Maceda, Ortega, Primicias, Valdez, Raquiza ken dadduma pay a nagturay ken nangituray. Iti Marcos regime, nasken nga armen nga umuna ni agngayangay a para senador dagiti Ilokano. Ngamin, sangsangkamaysa daytoy a puli iti inda ibotos.

Nabileg ti solid north. Ket asinoman a suportartanna a para senador, sigurado la ketdi a mangabak.

Ngem iti imasna ken paitna, nagrikki ti solid north iti pannakarippuog daydi Presidente Marcos.

Ta kalpasan iti duapulo a tawen, nagbassit ti bilang dagiti timpuar nga Ilokano iti senado, a nangiparangarang iti pannakadayyeg ti solid north iti pannakapatapuak iti poder ni daydi Presidente Marcos. Lalo ket Ilokano met laeng dagiti nangidaulo iti pannakapatapuak ti Ilocano strongman, da Gen. Fidel Ramos ken Juan Ponce Enrile. Dayta solid north ket saan a narukod ti bilegna kadagiti naglabas a nasional eleksion, gapu iti ikakayakay no diman ket panagduadua iti bilegna no diman di inikkan ti importansia. Kasla nasebseban nga atong.

Iti uneg iti duapulo a tawen, da laeng Enrile, Ramos, Flavier, (Alvarez ken Magsaysay?) ti nagngayangay iti nasional eleksion. Banag a saan nga umanay a medida wenno pagibasaran iti kinabileg no adda pay daytoy a bileg ti solid north wenno awanen kalpasan ti rehimen ni Marcos. Ngamin, iti pannakapatapuak ni Marcos, nairaman met a nagudua ti botos ni Ilokano. Saan a maawagan a solid (north) wenno sangsangkamaysa ta naisandi ti nawaywaya ken nalawlawa a kapanunotan no ania iti rumbeng ken maiparbeng a keddeng.

Nasken a maipasngay manen. Ti pannakaipasngay manen ti solid north ket kasapulan ti maysa a politiko nga agpannuray saan laeng nga iti makagargari a karisma ken napudno a panagserbi no dipay ket napaneknekan iti inna panangidaulo babaen iti pannakaited kenkuana ti respeto saan laeng nga iti lugarna no dipay ket iti sibubukel a komonidad ni Ilokano saan laeng nga iti Rehion Uno, Dos, Tres, Cordillera, iti sibubukel a pagilian no dipay ket iti sangalubongan.

Iti panagtaray ni IS Gov. Luis “Chavit” Singson para senado, matingiting, maamuan no sibibiag pay, no adda pay laeng ti pagbutbutngan a puersa ti solid north.

Aggibus ti takem ni Flavier, ket nasken ti maysa wenno ad-adu koma pay nga Ilokano iti senado a kas pannakabagina. Isu nga itoy a gundaway, mabisin ni Ilokano iti kinaadda ti mangibagi kenkuana iti senado.

Ket daytoy a pannakabisin, isu daytoy ti taraon wenno mitsa iti ibabangon manen ti solid north. Iti kaanoman, saan a kayat ni Ilokano nga awan iti mangibagi kenkuana iti senado.

Ta uray dagiti kritiko, dagiti napeklan a kritiko ni Singson, ket impasiguradoda ti suportada kenkuana, malaksid kadagiti amin a pulitiko iti amianan. Itoy a punto, adda manen dayta a panagkaykaysa ni Ilokano, a kas iti panagkaykaysa iti tagnawa wenno panagtitinnulong; nga am-ammom man wenno saan, kabusorman wenno gayyem, nasken a makibinnadang ta maysa dayta a nga Ilokano. Ni Ilokano, dinanto pulos a baybay-an ti padana nga Ilokano, iti nagan ti imbag ken pagimbagan ti sapasap.

Nabileg pay aya ti solid north? Paliiwen ti resulta ti masungad a nasional eleksion.

Iti biang ni Singson, saan laeng a ti solid north ti mangkibin kenkuana iti senado no di ket ti liga dagiti probinsia a nangiyendorso kenkuana ken ti kinapapolarna a kas kangrunaan a pigura iti pannakapatapuak ni Presidente Estrada. Ket daytoy a kinapapolarna, adda kenkuana ti kadakkelan a porsiento dagiti botante, dagiti agtutubo a nakaimatang iti inaramidna a kinabanuar. Ti naganna ket nailamina wenno dipay laeng naikkat kadagiti agtutubo. Agtaud ti kadakkelan a botosna manipud kadagiti agtutubo. Isu daytoy ti kangrunaan a rason no apay a kasapulan ti team unity ti presentena, gapu ti guyodna kadagiti agtutubo a botante. Asinoman a suportaran ti youth sector, sigurado a mangabak ta isuda ti kadakkelan a bilang dagiti botante.

Masurotan ngata ni Singson ti baddek dagiti Ilokano a naglatak ken nangidaulo iti senado a kas kada Senate president Camilo Osias ti La Union, Senate pro-tempore Prospero Sanidad ti Ilocos Sur, Senate president Quentin Paredes ti Abra? Paliiwen… #


Link