Wednesday, August 08, 2007

White Cane Week

White Cane Week, nasam-it iti pannakaselebrarna


Iti umuna a lawas daytoy a bulan, Agosto, nasam-it iti pannakaselebrar ti tinawen a White Cane Week. Daytoy a selebrasion ket saan laeng nga iti pagilian no dipay ket iti sangalubongan.

Ta ania aya ti makunkuna a White Can Week?

Isu daytoy ti Akta Republika Bilang 6759 wenno White Cane Act. Kasinnallabay daytoy nga akta dagiti dua pay a kaarngina, ti Akta Republika 7277 wenno ad-adda a maawagan iti Magna Carta for Disabled Persons ken ti Batas Pambansa Bilang 344 wenno mas papolar a maawagan iti Accessibility Law.

Ti National Council for the Welfare of Disabled Persons (NCWDP) iti mangaywan ken mangasibay iti pannakaimplimentar kadagitoy a linteg a pagsayaatan dagiti addaan iti an-annayen.

Karaman pay dagiti sumaganad a linteg a kas kanayunan iti pannakipaset dagiti addaan iti an-annayen iti gimong: International Labor Organization Convention No. 159 wenno ad-adda a maawagan iti Vocation Rehabilitation of Persons With Disability.

Nasken met a sallabayen ken atibayen ti gobierno dagiti addaan iti an-annayen wenno disabled person a nangrugi pay idi 1917 a binadangan met dagiti non-government organization.

Idi January 16-20, 1978 ti pagilian ti nakaaramidan iti Second International Conference on Legislation Concerning the Disabled nga inorganisa ti Rehabilitation International ken ti kabadangna iti pagilian, ti Philippine Foundation for the Rehabilitation for Disabled Persons (PFRD). Iti nasao a pasken, pinirmaan ni Presidente Ferdinand E. Marcos ti Presidential Decree 1509 tapno mabuangay ti National Concerned for Disabled Person.

Babaen kadagiti naparnuay a linteg ken ahensia ti gobierno, naidanon kadagiti disabled person dagiti serbisio ti gobierno kadakuada a kas patas ken kaparis a benepisio nga aw-awaten ken sagsagrapen dagiti awanan an-annayen.

Kadagitoy a linteg iti nangipaay iti panagpapatas ti amin nga umili, adda man ti an-anayen ken awan. Panangipaay iti karbengan iti ania man a kapanagan, iti man panangbirokan iti trabaho, iti benepisio ti salun-at, edukasion, pabalay ken dadduma pay.

Ti panangarakop-panangsallabay kadagiti addaan an-annayen ket saan laeng a solo a responsibilidad ti gobierno no dipay kadagiti amin nga umili. Awan koma iti maikuspil ken awan iti maidumduma. Awan iti mailemmeng nga umili ta amin ket addaan iti karbengan a makipaset iti sibilisado a gimong. #

No comments: