Wednesday, May 02, 2007

Abrasa ti Kurang ti Plumada


Dua a dadakkel nga organisassion dagiti agdadamo a mannurat ti nabayagen a nabukel: ti Timpuyog dagiti Agessem iti Literatura Dagiti Ilokano a Pintek (wenno TALDIAP) a nabuangay idi Setiembre 15, 2005; ken, ti Isagutko Kenka Writers Club (IKWC) a nabuangay idi Disiembre 22, 2006. Dagiti kameng ken opisiales ket manipud iti nagduduma a sector: estudiante, OSY, mannalon, mangngalap ken iti labor sector, nagannak, dagiti oldies but goldies, ken dadduma pay a sector.

Nangbukelda iti timpuyogda tapno lalo pay a tumibkerda. Tapno isudan a mismo iti agiinnadal.

No ti gartemda nga agsurat, kasda la nakakita iti marsaba a salamagi. Napingetda a makasursuro nga agsurat iti daniw ken sarita. Ngem saan nga umanay ti inda panagpursigi no awan iti mangabrasa kadakuada, no awan iti mangidalan kadakuada kadagiti umno nga aramidenda.

Ti saanda a pannakatarabay ket ad-adda pay iti inda panagpursigi, ket kuna ti maysa a pundador ti TALDIAP, Leonardo R. Agunoy: “Ti timpuyogmi ti konseho a pakakedngan ti parikut tapno maisarakan-maipamuspusan iti risut….”

Iti met IKWC, kuna ti agbayserda, ni Ms. Estrelita “Mama Es” Del Rosario, Station Manager 90.7 MHz FM Radyo Natin, iti pannakiumanko kenkuana idi iti aldaw ti Abril 7, 2007: “Addaanda iti regget ken napipintas dagiti kapanunotda ken paniriganda kadagiti sursuratenda, isu a naan-anay ti itedko a suporta kadakuada…”

Nakapamindua pay ketdin a, a nagpaseminar-workshop ti IKWC. Ti kaudian ket napasamak iti mismo a residente ti presidente, ni Romeo Licudine, iti Brgy. Saoat, Tagudin, Ilocos Sur Idi Abril 21, 2007. Agmalmalem nga inda panagiinnadal no kasano iti agsurat iti daniw ken sarita. Adda met ti pasalipda iti On The Spot Poetry Writing Contest kadagiti worksiapda.

Daniw ti ipangpangruna dagiti dua a timpuyog, a kas radio base wenno ad-addda a radio ti outlet dagiti putarda: ti IKWC, ti 90.7 MHz FM Radyo Natin, a masarakan iti Brgy. Magsaysay, Tagudin, Ilocos Sur. Daytoy a timpuyog ket sakupenna ti probinsia ti Ilocos Sur ken La Union. Dakkel ti bilangda ta umabutda iti nasurok asangagasut ken pito puo dagiti rehistrado. Maibasa dagiti daniwda iti programa nga “Isagutko Kenka” (a nakaadawan ti nagan ti timpuyogda) babaen ken ni Eduard Britos wenno ad-adda nga am-ammo iti nagan a DJ Edwin. Agpaspasalip pay ti timpuyogda iti panagsuratan iti daniw ken ababa a salaysay.

Iti TALDIAP, maibasa dagiti daniw iti programa a para iti literatura iti CMN Radio DZEA iti Siudad ti Laoag babaen ken ni Leonard Domingo Villa, iti pannarabay ti naanus nga Station Manager, ni Rev. Fr. Nolasco “Tom” Pascua.

Malaksid iti radio, naipablaak met dagiti putar dagiti dua a timpuyog kadagiti dua a kadakkelan ken kalatakan a rehional a pagiwarnak: ti Tawid News Magazine iti Rehion I ken ti The Valley Journal iti Rehion II.

Iti Tawid, inikkak iti bennegda, (a kas editor) “Ti Benneg Dagiti Kattungbol” (The Budding Writer’s Corner) a pakabasaan kadagiti dandaniwda. Napaliiwko a nagdarasda a makasursuro ken sadiwa (fresh) dagiti idea dagitoy a mannurat. No naan-anay ti pannakatarabayda, lalo pay a bumaknang ti agamang ti Literatura Ilokana.

Kadagiti ipatpatulod ti “The Valley Journal” a kopiak babaen iti editorda, ni John Buhay, ken presidente ti Timpuyog Dagiti Mannurat iti Iluko (TMI Filipinas), napaliiwko kadgiti sinuratda iti isu met laeng a laing, panirigan, kapanunotan ken sirmata dagitoy a mannurat kadagitoy dua a timpuyog.

Kasapulan unay iti pannarabay dagiti dua a timpuyog, ta iti masakbayan, isudanto ti mangitakder ken mangparang-ay ti bukodtayo a dila.

“Apay a dimo buklen ti Timpuyog Dagiti Mannurat iti Radio,” impalapalko a karit ken ni Danny Antalan, news reporter ti Tawid News Magasin ken reporter-anchorman ti DZTP, Candon City. Adda met ti programa a para Literatura Ilokana ni Danny. Dandani payen aggibus ti Salip ti Daniw 2007, nga inseponsoran da Arlane Manzano, Terry Tugade ken dadduma pay. Ngem awan ti timpuyog dagiti mannurat ti DZTP. Isu nga insingasingko iti pannakabuangay ti timpuyogda wenno panagtitipkel koma met dagitoy a mannurat ken aggessem iti literatura nga agsursurat iti DZTP.

Abrasa iti kasapulan ti plumada tapno dumur-as pay. Kasapulanda iti nabara a takiag a sadagda iti inda panagkalatkat.

Dagiti opisiales ti IKWC: Presidente, Romeo Licudine; Bise Presidente, Guillermo Lardizabal; Sekretaria, Gliceria Manzano; Katulong a sekretaria, Ma. Corazon "Dj DM" Moria; Tesorera, Maritess Bulatao; Oditor, Jessie 'Dj Ace" Fabro; PRO's, Harry "Dj Wency" Manzano ken Alejandro Pascua, Jr.; Buss. Managers, Leo Legaspina ken Edwin Edmark de Guzman; Musa, Julie Pat Lanuza ken Adonis, Philip Binay-an. Agpaay a mamagbaga da Mayor Roque S. Verzosa, Jr. ti Tagudin, Ms. Estrellita "Mama Es" del Rosario - Station Manager 90.7 MHz Fm, Ptr. Romeo Patacsil, Ptr. Leonito Torreliza, Monica Flores ken Mr. Moises Laza.

Dagiti opisiales ti TALDIAP: President, Jorge G. Placido; Vice President, Leonardo R. Agunoy; secretary, Eroline G. Martinez; asst. Secretary, Recson Pante; treasurer, Edward F. Pasalo; auditor, Rufino C. Dugay; PIO, Emerson Ramos; bus. managers, Kerwin Domingo & Rodel Reyes; muse, Aira Rowena R. Banglas; advisers, Mr. Leonard D. Villa, Mrs. Agustina Rabago-Bugaoisan & Sr. Melanie Luz Morales, asst. station manager, CMN Radio DZEA; spiritual adviser, Rev. Fr. Nolasco “Tom” Pascua, station manager, CMN Radio DZEA; legal counsel, Atty. Mariano Nalupta, Jr.

Iti pannakiinnumanko, adda ti panagduadua ni Ms. Estrelita “Mama Es” Del Rosario, Station Manager 90.7 MHz FM Radyo Natin, iti sabali a format ti programa iti FM radio, ti kinaadda ti para iti literatura. Maam-ammo ngamin a pasig a tokar ken damag iti mangngeg kadagiti FM radio. Ngem itan, addan ti dandaniw ken dagiti ababa a salaysay dagiti kameng ti IKWC.

Ngem, insungbatko met a maysa nga innovation daytoy. Uray kadakami idiay Baguio ket inaramatmi (dakami iti Baguio Writers Guild) ti dua nga FM Radio a nagidaniwan kadagiti putar dagiti mannaniw iti Baguio babaen iti tulong ti UP-Baguio Educational Foundation ken National Commission for Culture and the Arts.

“Pamrayanmi laengen iti agsurat iti radio (DZEA)…” madlaw iti kinapakumbaba iti anag ti surat ni Narding Agunoy. Mabasa iti kinalam-ek iti panawenda ket kasapulan iti abrasa.

Ngem saanda la ngata nga ammo (TALDIAP), a nagsursuratak met iti programa a naipatangatang iti DZEA! Manipud iti tawen 1991 agingga iti 1995. Babaen kadagiti dua a religious drama program: “Ti Biag Ni Jesus” ken ti “Dalan, Kinapudno, ken Biag.” Pito a tawen, (1991-1997) a nagsursuratak kadagiti sangapulo ket tallo a drama ti Catholic Media Network (CMN), a naipatangatang met laeng kadagiti amin a CMN radio iti Northern Luzon a kas iti DZCV, Tuguegarao, Cagayan; DWRV, Bayombong, Nueva Vizcaya; DZWT, Baguio City; DZPA, Bangued, Abra; DZNS, Vigan, Ilocos Sur; ti maysa pay a CMN radio iti Alaminos City, Pangasinan ken uray iti DWDY, Ilagan, Isabela. Malaksid kadagitoy sangapulo ket tallo a programa ti CMN, adda pay ti tallo a drama translation a suraten met laeng toy numo, a kas ti “Adda Latta Namnama” ti Lutherans ken kadagiti drama program dagiti ahensia-nasional.

Kasapulan a maabrasa dagitoy a budding writers. Saan laeng koma nga akem dagiti radio a nanginaw kadakuada, ti Tawid News Magasin, ken ti The Valley Journal no di ket datayo amin amin a mannurat a nakaibudaken ti naganna iti Literatura Ilokana.

Kasapulan a maabrasa dagitoy a budding writers. Saan koma ida a baybay-an; ta ti panangbaybay-a ket idatengna iti dakdakkel a posibilidad iti panaglaylay iti masakbayan, ta kaiyariganda iti bukel a nagtubo iti nabato a daga. Iti panangtagiben ti bukod a dila, uray no dida kameng iti GUMIL wenno TMI dagitoy a timpuyog, karamanda met iti panagdur-as ti Literatura Ilokana…

Ur-urayenda ti abrasam…ita koman!

“Uray no dagiti nagpalausan a makinilia la koma,” dayta man ti arungaing ti dua a grupo. Makaisemak, wen, ta iti baet nga intay panangipasulin wenno panangibaber pay ket ngatan a, kadagiti dadduma ti makinilia, isuda ket kasapulanda la unay a kas kangrunaan a gamigamda iti inda met pannakiraman a panangparangpaya ken panangpatalinaed iti agnanayon ti bukodtayo a dila.

Iti krismas parti idi 2006 a dinar-ayak, sinagutan ti GUMIL La Union ti makinilia ken liblibro ti maysa pay a timpuyog dagiti budding writers, ti Pluma ni Bucaneg, babaen iti panangidaulo ni Rodgerry Rodriguez. (Ni Romeo Licudine ti nangawat ti makinilia.) Nagdakkel ti panagpuspuso ti GUMIL La Union babaen iti panangidaulo ni Djuna Alcantara, ta dina impaidam ti aniaman a maitulongda kadagiti agdadamo ken sumingsingising a mannurat. Umadu koma ti kas kadakuada!

Ti TALDIAP ken IKWC ket agur-uray met iti abrasam, kabsat a mannurat ken patron ti Literatura Ilokana… ita koman! ##


Link

2 comments:

ariel said...

Good. Let the Literatures of the peoples of Amianan, Ilokano and the other languages live. Agsurat koma pay ni John Buhay iti lengguaheda idiay Apayao wenno Kalinga tapno maadalan datao.

jim agpalo, jr. said...

wen, umad-adu dagiti rusing ti ingpen a santak, ka ariel... adda pay a ti grupo a kas met laeng iti grupo dagitoy... radio base met laeng... napan idiay curimao ti presidenteda... mapanda koma met dagitoy iti konperensia ti TMI, aya? diak inkabil-dinakamat daytoy a grupo iti cagayan ta nakabawak ti nagan ti grupoda...ketdi, contributors dagitoy iti saringit mag nga ina ti tawid...