Monday, March 05, 2007

SOLID NORTH!!!

Nabileg Pay Aya Ti Solid North?

Solid North. Maysa nga Ilocano block. Kayatna a sawen ti panagkaykaysa dagiti amin nga Ilokano iti maymaysa nga itandudo nga ibutos.

Maysa a kultura ti solid north. Panagkaykaysa ni Ilokano, manipud iti rehion uno, dos, tres, Cordillera ken uray Kamanilaan ken amin a paset ti pagilian a yan ni Ilokano. Ta nagwaras met ni Ilokano. Sabali pay dagiti OFW ken dagiti agindegen iti sabali a pagilian.

Daytoy a solid north ket addan uray idi un-unana a panawen, uray idi panawen da Presidente Elpidio Quirino.

Idi panawen iti panagtakem ni Presidente Marcos, lalo pay a pimmigsa ti solid north, ket naaddaan dagiti nabibileg a politiko a kas kada Aspiras, Ablan, Albano, Agbayani, Cendana, Clave, Crisologo, Dupaya, Dy, Enrile, Estrella, Maceda, Ortega, Primicias, Valdez, Raquiza ken dadduma pay a nagturay ken nangituray. Iti Marcos regime, nasken nga armen nga umuna ni agngayangay a para senador dagiti Ilokano. Ngamin, sangsangkamaysa daytoy a puli iti inda ibotos.

Nabileg ti solid north. Ket asinoman a suportartanna a para senador, sigurado la ketdi a mangabak.

Ngem iti imasna ken paitna, nagrikki ti solid north iti pannakarippuog daydi Presidente Marcos.

Ta kalpasan iti duapulo a tawen, nagbassit ti bilang dagiti timpuar nga Ilokano iti senado, a nangiparangarang iti pannakadayyeg ti solid north iti pannakapatapuak iti poder ni daydi Presidente Marcos. Lalo ket Ilokano met laeng dagiti nangidaulo iti pannakapatapuak ti Ilocano strongman, da Gen. Fidel Ramos ken Juan Ponce Enrile. Dayta solid north ket saan a narukod ti bilegna kadagiti naglabas a nasional eleksion, gapu iti ikakayakay no diman ket panagduadua iti bilegna no diman di inikkan ti importansia. Kasla nasebseban nga atong.

Iti uneg iti duapulo a tawen, da laeng Enrile, Ramos, Flavier, (Alvarez ken Magsaysay?) ti nagngayangay iti nasional eleksion. Banag a saan nga umanay a medida wenno pagibasaran iti kinabileg no adda pay daytoy a bileg ti solid north wenno awanen kalpasan ti rehimen ni Marcos. Ngamin, iti pannakapatapuak ni Marcos, nairaman met a nagudua ti botos ni Ilokano. Saan a maawagan a solid (north) wenno sangsangkamaysa ta naisandi ti nawaywaya ken nalawlawa a kapanunotan no ania iti rumbeng ken maiparbeng a keddeng.

Nasken a maipasngay manen. Ti pannakaipasngay manen ti solid north ket kasapulan ti maysa a politiko nga agpannuray saan laeng nga iti makagargari a karisma ken napudno a panagserbi no dipay ket napaneknekan iti inna panangidaulo babaen iti pannakaited kenkuana ti respeto saan laeng nga iti lugarna no dipay ket iti sibubukel a komonidad ni Ilokano saan laeng nga iti Rehion Uno, Dos, Tres, Cordillera, iti sibubukel a pagilian no dipay ket iti sangalubongan.

Iti panagtaray ni IS Gov. Luis “Chavit” Singson para senado, matingiting, maamuan no sibibiag pay, no adda pay laeng ti pagbutbutngan a puersa ti solid north.

Aggibus ti takem ni Flavier, ket nasken ti maysa wenno ad-adu koma pay nga Ilokano iti senado a kas pannakabagina. Isu nga itoy a gundaway, mabisin ni Ilokano iti kinaadda ti mangibagi kenkuana iti senado.

Ket daytoy a pannakabisin, isu daytoy ti taraon wenno mitsa iti ibabangon manen ti solid north. Iti kaanoman, saan a kayat ni Ilokano nga awan iti mangibagi kenkuana iti senado.

Ta uray dagiti kritiko, dagiti napeklan a kritiko ni Singson, ket impasiguradoda ti suportada kenkuana, malaksid kadagiti amin a pulitiko iti amianan. Itoy a punto, adda manen dayta a panagkaykaysa ni Ilokano, a kas iti panagkaykaysa iti tagnawa wenno panagtitinnulong; nga am-ammom man wenno saan, kabusorman wenno gayyem, nasken a makibinnadang ta maysa dayta a nga Ilokano. Ni Ilokano, dinanto pulos a baybay-an ti padana nga Ilokano, iti nagan ti imbag ken pagimbagan ti sapasap.

Nabileg pay aya ti solid north? Paliiwen ti resulta ti masungad a nasional eleksion.

Iti biang ni Singson, saan laeng a ti solid north ti mangkibin kenkuana iti senado no di ket ti liga dagiti probinsia a nangiyendorso kenkuana ken ti kinapapolarna a kas kangrunaan a pigura iti pannakapatapuak ni Presidente Estrada. Ket daytoy a kinapapolarna, adda kenkuana ti kadakkelan a porsiento dagiti botante, dagiti agtutubo a nakaimatang iti inaramidna a kinabanuar. Ti naganna ket nailamina wenno dipay laeng naikkat kadagiti agtutubo. Agtaud ti kadakkelan a botosna manipud kadagiti agtutubo. Isu daytoy ti kangrunaan a rason no apay a kasapulan ti team unity ti presentena, gapu ti guyodna kadagiti agtutubo a botante. Asinoman a suportaran ti youth sector, sigurado a mangabak ta isuda ti kadakkelan a bilang dagiti botante.

Masurotan ngata ni Singson ti baddek dagiti Ilokano a naglatak ken nangidaulo iti senado a kas kada Senate president Camilo Osias ti La Union, Senate pro-tempore Prospero Sanidad ti Ilocos Sur, Senate president Quentin Paredes ti Abra? Paliiwen… #


Link

6 comments:

ariel said...

Jim:
maysa a politikal a mito ti 'solid north.' it does not exist except as a come on. the empirical data does not support this claim. kayatna a sawen, dagiti politiko a kayatna ti makaala iti butos dagiti nanakman, nasken nga agnakemda ta awan kinapudno ti mito politikal a kastoy.

jim agpalo, jr. said...

sakbay ti marcos regime, nalabit nga adda, ta no awan saan a timmakder da osias, paredes ken sanidad... mararaem dagitoy...

iti panawen ti martial law, napigsa ti diktadoria a mangidikta ti kayatna isu nga adda ti solid north

ngem kadagitoy a panawen a nawayawayaanen ti utek ti umili ken makaamirisen ti angot ti ginelgel a baraniw, diak la a masinuo no di idiaya dagiti botante ti pinitpit a bawang, ha-ha-ha!

ariel said...

exactamente, senor. saanen a kuneng ti umili, kunan sa.

rva said...

awan wenno awanen ti "solid" north, manong jimmy.

ti adda ket "liquid" north.

wenno "gas" north.

nalunagen 'di solid, nagawaaw payen.

ngem kas maysa nga ilokano, ibutoskonto met, a, ni chavit para senador.

jim agpalo, jr. said...

"awanen" nalabit ta ad-adun ti baro a rupa... isu a paliiwen no nagsubli wenno saan... imbga pay kenka ta nakedngamon, hehehe!

Alfonso Quilala Jr. said...

Saan nga agpaypayso ti Solid North. Adu idi ti agrereklamo, agraman kaniak, no apay nga saan nga naibilang diay botos da ta nasiro diay kalaban ni Marcos ket binutosan da met. Puro sinisuitik ti Solid North.