Thursday, February 01, 2007

Ti Sikap ti Kamara

Editorial Tawid News Magasin ( Monday, 29 January 2007)


Itay nabiit, impasa ti Kamara ti P125 across-the-board wage increase.

Babaen ti House Bill No. 345, maited ti nasao a wage increase iti staggered basis iti tallo a tawen, P45 ita a tawen, P40 iti 2008, ken P40 iti 2009. Iti umuna a taldiap, mabalin a maiyebkas ni trabahador ti panagyamanna ta “nakariing” met laeng dagiti mararaem a diputado ta impasada ti gakat. Saan met a palimed a kontra dagiti pasdek-negosio iti wage increase, nangruna iti kastoy kadakkel a maituon iti sueldo. Sangkakunada a saan a kabaelan ti negosio, aglalo dagiti small, medium enterprisses wenno bassit ti puonanna ti mangipaay iti nayon a sueldo kadagitoy a tiempo.
Sangkaulitda a no maited ti wage increase, mapilitan dagiti pasdek-negosio ti agkissay iti empleado wenno trabahador. Iti uray ania a sirig, ballaag wenno pammutbuteng dayta.

Malaksid dayta, no mangnayonda iti sueldo, dagitinto umili ti pagdapaganda agsipud ta maipasanto kadakuada daytoy kanayonan a pagbusbosan dagiti kompania.

Sarurongan met dagiti opisial ti labor daytoy a kalintegan dagiti negosiante. A kasla ketdin dagitoy ti pagpapaayanda iti serbisio a di ket koma dagiti trabahador.
Ngem iti maikadua a taldiap, masiriptayo a maysa manen daytoy a “nainsiriban” nga addang nga inwayat ti Kamara tapno maipasungalngal ti Senado.

Agasem, innem a tawen a tinugtugawan ti Kamara daytoy a gakat ket ita, sinukitda iti katapokan ket impasadan.

Adda ngarud naun-uneg a rason no apay a kellaat lattan nga impasa ti Kamara ti nasao a gakat uray iti sanguanan ti pannakapagurada kadagiti dadakkel a pasdek-negosio.
Umuna, eleksion inton Mayo daytoy a tawen. Kaaduanna kadagiti agilinlinteg iti Kamara ti dumatag manen kadagiti botante. Saan a mailibak a dakkel a puersa dagiti trabahador a mangbitibit wenno mangibasnot iti kandidaturada.

Kasapulan ngarud dagiti agilinlinteg a liwliwan daytoy a sektor. Iti bakal ti politika iti pagilian, saan a kabaelan ti politiko ti mangitag-ay iti kandidaturana no di iti kuarta ken panangbitibit dagiti umili. Iti panangipasada iti P125-wage increase, kasla sinam-it ti pagbanagan dagiti diputado. Bumanglo ti ladawanda kadagiti umili.

Ngem kinapudnona, ammo dagitoy nga agilinlinteg nga uray agdeppa dagiti mangmangged, saan nga umanamong dagiti negosiante. Ammoda nga iti P125-wage increase ket saan a praktikal a maiwayat iti daytoy a panawen a di pay nakalung-aw ti ekonomia ti pagilian.

Agdapag ngarud nga impasa ti Kamara ti nasao a gakat ket makaammonton ti Senado nga agsarapa kadagiti maibato a pammabalaw no bilang di pumasa daytoy kadagiti senador.
Iti uray ania a panirigan, maysa daytoy a wagas ti Kamara a panangpastidiar iti Senado. Pagparangenna a lapped ti Senado iti panagdur-as ti panagbiag dagiti tattao ken iti ekonomia ti pagilian ket kasapulan a mapukaw daytoy tapno agbalin a unicameral ti porma ti gobierno iti babaen man iti parliamentaria wenno presidensial.

Adda ngarud iti Senado iti nakain-inaka a situasion nga aniaman nga addangna ket mapuruakan latta iti pammabalaw.

No ipasana ti saan a realistiko a gakat a P125-wage increase, matugkikna ti ibubusor dagiti negosiante. No dina garawen ti gakat, ibaganto met dagiti trabahador nga awan ti panangipategda kadagiti babassit nga umili.

Kastoy ti klase ti panangituray iti pagiliantayo. Ti nakaladladingit, agbalin a kasla peon dagiti umili a pagtigtignayen dagiti politiko.

2 comments:

ariel said...

Ka Jim:
Adda ngata papananna dayta no pangatuenna ti gatad ti magatgatang? Apo a manangngaasi, kaasiannakami! ngem, ala, an-anusantayo ta ditay met ngamin nagpadi, nagmadre, nagsenador, nagkonggresman, ken nagmayor!

jim agpalo, jr. said...

kasda la ngamin asoi ken pusa dagitoy dua a legislative body... ket tapno maikkat ti responsibilidad ti kongreso kadaytoy a saritaan, inaprobarannan tapno makaammon ti senado no ayunanna wenno saan...ayunanna man wenno saan, addan iti senado ti responsibilidad ken pannakaladdit kadagiti umili, kadagititrabahoador ken agpupuonan...

mayswa mnga inuubing nga aramid ti panangliklik iti responsibilidad para iti pagsayaatan dagiti umili...