Monday, July 31, 2006

Daytoy man!

“Super regions”, preparasion iti pederal a gobierno – Chavit
By Tawid News Team (Sunday, 30 July 2006)

VIGAN CITY - Kinuna ni Gov. Luis “Chavit” Singson a napigpigsada a makipatang kadagiti agipupuonan manipud iti ballasiw-taaw babaen ti pannakapormar dagiti super regions
.
Full Story »

Thursday, July 20, 2006

ACCENTUAL VERSE




ACCENTUAL VERSE

Kasano iti pannakaada ti ACCENTUAL VERSE iti Iluko nga addaan iti nagduduma a bengngat (accent), pannakaisao (prosody), pannakaidasig (analogy) ken pannakaiyurnos (syntax)?

Dakkel la ketdi a parikut.

Ngem saritaek laeng dagiti padas ken eksperiensak maipapan iti accentual verse.

Accentual verse a kabaliktad (sa?) ti SYLLABIC VERSE? Wenno iti kagingginnuyodanna, kunata man laengen ta nalawlawa ti kayatna a sawen.

Ulitek manen a, saritaek laeng dagiti padas, paliiw ken kapanunotak maipapan itoy.

Adda kadi dagiti daniw nga accentual verse iti Iluko?

Nalabit nga adda. Dagiti Rima-Iluko.

Nalabit nga awan. Ta nagduduma la ngarud ti accent, prosody, analogy ken syntax ti Iluko. Depende ngamin ti nangisawang no TAGA-YO (Ilocos Sur, isuda laeng ti agsasao iti addaan iti balikas a yot – in silent “T” please); TAGA-LATTAN (Ilocos Norte, agipus dagiti saoda iti balikas a LATTAN); TAGA-KIEN (Western Pangasinan Iluko); TAGA-WIN MIT (Uptown Iluko ken Cordilleran Iluko, conversational Iluko iti “wen met”); TAGA-KADI (Cagayan-Isabela nga adda latta ti maisapit a balikas a KADI kadagiti saoda), TAGA-DETA (Ilocos Norte-Cagayan, a no apay a nagbalin a DETA ti balikas a DAYTA, conversational-Iluko, ti rason a makitak), TAGA-ATOY (Eastern Pangasinan Iluko, a no agsaoda ket ATOY, ADIAY, ATA, conversational-Iluko ti rason, kunata manen…); TAGA-NGAY (La Union); TAGA-YONG (Agoo, Aringay, Sto. Tomas, La Union); TAGA-ME’ (“met” in silent “T” iti 1st District ti Ilocos Sur; T ken dadduma pay. No addaka iti “melting pot” wenno pagdidinnanonan dagiti amin a puli, ken inaldawmo ida a makapulpulapol, mapaliiwmo dagitoy. Iti inaldaw a panaglakok iti prutas ken nateng iti Engineer’s Hill Satellite Market, adu dagiti nagsasabalian a bengngat, pannakaidasig, pannakaisao ken pannakaiyurnos. Nagduduma pay dagiti termino kadagiti probinsia wenno disso ti lugar. Daydiay laengen balikas nga ASO ken PATANI ket saan kano nga Iluko no di ket Tagalog! Ngimmato pay ti kidayko, yos! Angilan ken perkoles ti Ilukoda, kunana. Archaic argot, dagitan manong kunak iti lakay a nakasarukod nga agedad ngatan iti nasurok a pitopulo.

Accentual. Accent wenno bengngat.

Iti sabali a bangir, nadagsen a panangibalikas. Diin, kunada dagiti Tagalog.

No bengngat ti bagibasaran, narigat nga idasig ti kinaaddda ti accentual verse iti Iluko.

Ngem no iti DAGSEN iti panangibalikas, taldiapantayo laengen dagiti Rima-Iluko. Dagiti rima a kaunaan a nangngegko kadaydi tatangko. Adu dagiti rima nga ammo daydi tatangko. Insursurona idi ubbingkami. Ken nangguyugoy kaniak nga agbasabasa iti dandaniw ken uray ania ditan. Ta agisangpet met idi kadagiti magasin ken libro.

Kitaentayo man dagitoy dua a Rima-Iluko.

1) Adda asok burburan
Ti naganna pasaki
Pasaki ti naganna
Ti asok a burburan

Wen, nalabit nga adda met ngata a, accentual verse dita. Ngem iti panagkitak ket kasla met alliteration, consonance, assonance ken syllabic verse…

2) Bulong ti apatot
Paskuayo naimut
Rumuar makarurod
Pang-orek sarukod

Napia pay. Dayta nakabold face iti nakitak a yan ti accentual verse. Ngem no kitaen, kasla met rima (rhyme), assonance, consonance ken syllabic verse).

Hu, bay-amon dayta ac-accentual, hehehe. Makadadael laeng iti ulo, saan? Ta adda pay aya dagiti rukrukod kada rimrima iti Daniw-Iluko iti agdama a panawen ket manmano metten. Pasig met aminen a free verse. Nawaya a panangiyebkas (ti Iluko term kaniak ti free verse).

Ngem apay ngarud nga insuratko?

Dayta ket, hehehe!

Pagadalan ken tungtongan laeng a.

Ke tapno nalawlawag ti tungtongan, nasken a taldiapan dagiti academician a nanglaglagidaw iti accentual verse.

1. Ti titsermi sadiay Narvacan Catholic School, ti kaunaan a nakangngegak ti accentual verse. Ni Mrs. Fe Macabio-Viernes, ken mangisursuro itan iti Claveria State University ken katitseran ni Freddie Masuli. (a kas iti nakunana sadiay seminaran ti GF sadiay Suso idi 2005). Leksionmi maipapan iti literature.

No English iti pamnnakaisuratna a, ket wen. Adda dagitoy a porma, estilo, tekniko, device ken dadduma pay.

Ngem iti Iluko ngay? “Ay, maulawak, yong!” kuna dagiti taga Agoo.

Ngem ti imasna ket kaykayatko met iti agdaniw iti bukodko a dila. Ken no agdaniwak ket kayatko laeng met a pagustoan ti riknak. Kayatko laeng met a yebkas ti riknak, kapanunotak, paliiwko ken blah, blah, blah,blah! Lalo idi ubingak ket mayat met ti agiyebkas iti daniw iti bukot ti nuang wenno baka; iti tuktok ti niog, kamatiris, kaimito, santol, lomboy, bayabas ken dadduma pay; iti ngarab ti adalem a karayan sakbay a tumapuak; iti uneg ti banio kabayatan iti panagdigos. Idi tinedierakon, adda latta met ti a ti daniw a maiballaet no inkam agtapat.

Idi agtutuboak pay ket kapatorko met iti agikur-it iti daniw iti uray sadino ken uray ania: papel, kuaderno, notbok, puon ti saba, pader, kadaratan. Awan lang, trip lang. Pammagusto ti rikna ta ragsak met ti itdenna.

2. Ni (daydi) Pelagio Alcantara. Iti inna panaglektiur maipapan iti daniw idi 1986 iti seminar workshop nga inangay ti GUMIL-Baguio a napasamak iti Baguio City Auditorium, Burnham Park, tinagipintasna met ti daniw a nagbado iti accentual verse. Sakbay a simrek iti National Media Production Center, titser daydi Manong Pel.

“Sir, iti bukodmo nga opinion, apay nga adda dagiti daniw nga immortal?” daytoy man idi ti saludsod ni David Briones, estudiante ti law iti Baguio Colleges Foundation (University of the Cordillera itan).

“Mangitedka man iti ehemplo?”

“The Trees,” kunam la no inkorus dagiti estudiante ti Baguio City National High School.

Ti Daniw ni Alfred Joyce Kilmer.

Kuna daydi Manong Pel nga eksakto ti pannakagenned ti daniw babaen iti stress ken unstress.

Maulawak yong!

Ta ania ngamin aya ti accentual verse?

Definition:
1. of accent: involving or associated with accent or stress
2. based on stress: employing a structure based on the number of stresses in a poetic line instead of the number of syllables.

Accentual verse has a fixed number of stresses per line or stanza regardless of the number of syllables that are present. It is common in languages that are stress-timed such as English as opposed to syllabic verse, which is common in syllable-timed languages such as classical Latin.

Fixed number of stress.

Ket nagmayat iti pananggennegenned daydi Manong Pel ti daniw a “The Tree” iti insuratna iti pisara. Inuged-ugedannan ti stress ken unstress. Iti panangidaniwna, igiddanna pay ti panag-beat ti imana.

3. Ti presidente ti UP-Baguio, Dr. Priscilla S. Macansantos ken ti kaingungotna a ni Manong Butch ket nasasaoda met ti maipapan iti accentual verse. Lalo no pagtutungtonganmi ti maipapan ti daniw. Agpada nga academician. Uray ni Dr. Leoncio Deriada ket nailektiurna met ti maipapan ti stress ken unstress.

Ngem English met ngarud a daniw dagitoy.

Kasano koma ngarud a maaddaan iti accentual verse ti Iluko? Iti taray ti Daniw-Iluko, mas nalatlatak nga adayo ti nawaya a panagiyebkas (free verse) ngem dagiti nametro, nag-stress, nag-unstress, ken dadduma pay a porma, tekniko ken devices.

Siempre nasurot latta ti papolar. In na in.

No ti syllabic verse ken dadduma pay a berberso, wen, nalaka ti agaramid. Ngem no accentual verse, siguro a ket idisso pay laeng a dayta ta dumtengto (no adda) met a ti panawenna. Ta kasano koma a maaddaan ti accentual verse ti lenguahe nga addaan iti nagduduma nga accent, prosody, analogy ken syntax?

Adda no adda, a kas iti ehemplo a rima. Ngem no ita a kapator ken kapalatak ti free verse wenno blank verse, maidisso pay laeng. Addanto latta met a, iti mangpidut iti umno a panawen.

Hmmn…iti laengen sumaruno a topiko…##

Sunday, July 16, 2006

ACROSTIC-ILUKO

ACROSTIC-ILUKO

Adtoy manen ti sabali pay a rupa ti daniw, kailian. Porma, kunak man laengen.

ACROSTIC -- A verse in which certain letters such as the first in each line form a word or a message.

Karuprupa la unay ti Abcederian daytoy, kailian. Ti laeng nagdumaanda ket adda ti balikas wenno dagiti balikas a mangbukel kadaytoy a daniw. Ket daydiay umuna a letra iti linia ket isu ti rugi dagiti balikas wenno mensahe ti daniw.

Papolar la unay daytoy kadagiti agtutubo. Daytoy no kua iti kaunaan nga suraten lalo kadagiti addaan iti grupo wenng ‘gang” ket dayta naganda ket ikkanda iti mensahe wenno kaipapanan.

Uray kadagiti graffiti ket makita met no dadduma daytoy nga acrostic.Idi agtutuboak ket siak a iti para surat iti love letter dagiti kabaddungalan. No meaning laeng ti grupo a ket siak iti pakaikumitan no kua. Mahilig met datao no kua iti vandalism, hehehe, ket dagiti pader wenno puon ti kayo ket maisurat dita ti acrostic.

Saanko laeng nga ammo a daniw met gayam dagita. Ken saanko pay nga ammo nga acrostic gayam iti pangawag kadaytoy.

Uray dagiti puon ti nabun-as a saba no aggagatel ti utek idi agtutuboak pay ket maaddaan iti acrostic dayta.

Saan! Iti kaanoman ket saanko nga inarapaap iti panagbalinko a mannurat. Nupay kasta, napatpateg nga adayo ti libro wenno magasin a linaon ti makinlikud a bulsa ti pantalonko wenno siortpanko ngem ti sagaysay ken panio. Adda met dagiti ramay nga ikuraykay iti tuktok no kayat, saan? Panio, saan met a datao a butegan, ania! Mabalinen ti bukot wenno bangad ti dakulap a pagpunas, saanak met a naarte. No awan iti makakita, ti gayadan ti tisiert, a, hehehe! Puera manggas met a, tad into ke agbalin datao a Felix The Cat. Ngem ti libro wenno magasin? Kasla aggurigorak no awan dayta lalo no agbiaheak! Makagatangak iti pocket books ngem diak a makagatang iti tisiertko, yos! Ta nalastogak met ngamin idi agtutuboak pay dakayo, ket kunak man a, nga uray ania iti isusuotmo, no naguapoka, naguapoka latta a. Ken maysa, saan a mailemmeng ti napintas a bado ti narugit a nagan. O, di kadi?

Ket idi napan a bulan ti Abril, simrek manen iti kinasutil daytoy nga acrostic. Kadagiti amin nga acrostic a nabasak, daytoy man iti tagipintasek ta linaonna aminen a pammagbaga a kayat kadagiti kassagpat iti kinaestado.

Maika-9 nga inanakmi iti kasar ken baket. Da Rodrigo Miranda iti Quirino, Isabela ken ni Lilibeth Soley iti Itogon, Benguet. Nagkasarda idi Abril 28, 2006 iti alas-9:00 A.M. sadiay St. John The Evangelist Parish iti Quirino, Isabela. Agpada nga estudiante a di nakatutor. Ngem uray ta intuloy latta met ni Rod ti panagiskuela ket graduating iti BS Criminology. Ituloyto kano met ni Libeth ti panagiskuelana inton maibuangna ti bugi. Iti imbitasion, iti nakakitaak dayta nakapimpintas nga acrostic.

Kastoy man ti linaon dayta nga acrostic, kailian:

Marriage Creed

Listen to each other
Open your heart
Value your Union
Express your trust

Dayta man! Uppat laeng a linia.

No amirisen a nalaing, dagiti umuna a letra dagiti uppat a binatog ket mabasam dita ti maysa a balikas a mamagkayammet iti agassawa. LOVE. Ket dagiti mensahe dita ket para kadagiti agassawa. Naibaga dita. Kumpletos rekados.

Immemoriak dayta nga acrostic.

Ket iti maysa a “yuuli” sadiay La Union, naisurotak man. Inawisdak, di simmurotak met ta saanak man a pamiliar unay ti danon-danon. Nakapuy ti ideak ditoy ta diak pay napadasan. Patiek ngamin a ti masanguanan ket maaramatko dayta a nga eksperiensa, a tinallikudanmi ken ni Yolanda.

Napintas ti pammagbaga dagiti lallakay ken babbaket idi natinongen ti kaaldawan ti kallaysa. Pammagbaga kadagiti agkasar.

Ti nangawis kaniak, ammona a mannuratak.

“Denggentayo man met ti masao ni Pari Jimmy, maysa a mannurat…” kunana ketdin! Ket nakudkodko a dagus ti di met nagatel a tuktokko a. Pateltelak kamman, ta ipasubonak, indayamudomko iti unegko, kailian…

Ket nalagipko dayta “Marriage Creed” nga acrostic. Isun a ti usarek, kunak iti panunotko. Ket kunakon nga impasaksak.

“Lima a tawen a nagsursuratak iti adbays iti radio babaen iti programa a “Toy Numo Toy Biang, Manang Helen…”

“Ay, sika!” Adda ti nangisengngat a baket ket nasdaawda. “Ne, sika gayam iti agsursurat kadagita…?” Kuna pay ti maysa. Naipatangatang ngamin daytoy a radio-drama con adbays kadagiti nalalatak a radio stations iti Northern Luzon a kas iti DZNS, Vigan City; DZPA, Bangued, Abra; DZWT, Baguio City; DWRV, Bayombong, Nueva Vizcaya; DWDY, Isabela, ken maysa a Catholic radio station sadiay Tuguegarao, Cagayan ken catholic-run radio station sadiay Alaminos City, Pangasinan.

“…No mamagbagaak, agtaud iti pusok ti pammagbaga. Ti makunak met, ket ababa laeng ta uppat laeng dagitoy. Umuna: LISTEN TO EACH OTHER. iti ania man a kanito, dumngeg koma tunggal maysa kadakayo. No agsao ti maysa, dumngeg ti maysa a sipapasnek. Saankayo nga aggiddan nga agsao tapno agkinnaawatankayo. Iti panangdengngeg iti agsasao ket agtungpal iti panagkikinnaawatan. Daytoy a panagkikinnaawatan ti tulbek iti naragsak a pamilia…”

Ania ket nga isem dagiti dumdumngegen, kailian!

“Maikadua: OPEN YOUR HEART. Silulukat koma ti pusoyo iti tunggal maysa tapno nalaklaka pay a dumteng dayta a panagkikinnaawatan. Awan koma iti mailemmeng a sakit ti nakem wenno negatibo a banag iti uneg ti puso. Silulukat koma a kanayon dayta tapno ti linaonna ket makita ken maiyebkas a dagus. Iti ababa a pannao, adda ti nalawa ken nalawag a kumunikasionyo nga agassawa. No adda ti di kayat ti maysa, ibagana ket dumngeg met ti maysa. Kastanto met ti maysa. No pagsasaritaan ti parikut ken ti di kayat, maamiris ken masolbar dayta. Ta adda aya met parikut a di masolbar…?”

Inisemak ken pinerrengko ti inyarasaas itay ti kumaparik a kunana a kaub-ubinganna a balo ken awanan anak. Agpalpaliiw iti suli. Ngem natipedko pay laeng ti riknak a kiddayan. Nagsam-it ket ti paludipnan, kailian! Sal-it, malipatakkan, Yolanda, kunak iti bagik isu nga intuloyko man laengen…

“Ti maikatlo: VALUE YOUR UNION. Ipategyo iti inkay panagdenna. Sagrado ti kallaysa. Diyo patpatien a ti kallaysa ket sangkapirgis laeng a papel. Saan a pudno dayta. Daydiay papel a nakaisuratan ti naganyo, isu ti sangkapirgis a papel. Ngem ti kaipapanan dayta a pael ket napatpateg pay ngem balitok. Naibudak pay dita ti kinataoyo. Ti pinatipon ti Dios ket saan a mabalin a pagsinaen ti tao. Isu ngarud a kunak itay a no adda ti parikut a dumteng ket pagsasaritaan ken solbaren tapno saan a marakrak ti kallaysa. Ti panagdennayo koma ti lapped ti tunggal maysa tapno makontrol ti rikna a tumaliaw iti sabali….”

Nagbiddutaksa! Kunak man iti bagik, kailian, ta idi taliawek ni balo, ket nagdumog a kasla ketdin nabainan, yos. Ammona ngata a, nga addan ti Yolandak, yos!

“Maikapat ken maudi: EXPRESS YOUR TRUST. Agtalinaed koma nga agnanayon dayta panagtalek iti tunggal maysa kadakayo. No talken ti asawa, uray ania ti kakuyogna wenno kabinbinoltitna dita, saan a tumpuar kenka dayta nga imon agsipud ta adda ti panagtalekmo iti asawam a saanna a maaramid ti panangliputna kenka. Iti kanito a “sweet moment” wenno iruangan ti sweet moment, sawen latta ti panagtalek iti asawa. Uray no saan a sweet moment basta malagip dayta, sawen iti asawa tapno umun-uneg pay dayta iti kaunggan ket isunton ti lapped iti panagaramid iti di maikanniwas….”

Yos! Idi taliawek ni balo, likudanna laengen ti nataldiapak! Impakamakamko latta a minatmatam ti nasippukel a patongna iti pamudawen a luppo iti siortpanna a puraw nga inasmanganna iti venus cut a nalabaga a tisiert a kurangsa ti tela ta agparparang ti pusegna itay.

Pinutedkon ti pammagbagak. Ket ania ket ti palakpaken ti tallaong. Linamanodak pay a! Intagayannak pay ti nalipatakon ti naganna a kapitan daydiay a barangay iti sangasudo a basi. Inimaskon iti simmimsim a kagiddan ti pammadayawda.

Ngem yos, dida la ammo, a nagtaud dayta a pammagbagak iti ACROSTIC! Imbag man ta adda daydiay acrostic a “Marriage Creed,” ta no saan, nagkamulawak koman a nangbagbaga, hehehe!

Diak met imbagan a, a nagtaud iti acrostic ti pammagbagak. Ta ti kapatgan ditan ket ti mensahe.

Dayta man kalian. ACROSTIC. Padasenyo man met a.

Ania ti kunam, kailian? Nabitinka ken ni balo? Ala, ituloyko a…

“Agawidkayon, manong…” kunana a, idi agawidkami, sika. Ta inggagarak met a sinapul iti paraangan a kasla ketdin kailiwko ti isemna. Wenno imbaludnak ti isemna?

Saan koma pay a, ta adda man ti nakaibaludan dagiti matak a diak mauma a mangbuybuya, kunak man. Ket anian a sam-it ti isemnan!

“Asino met ngay?”

Dua nga agpa iti kaadayona ti kaasitgan kaniak, isu a kunak metten nga imperreng, yos: “S-sika…”

“N-napintasak, aya…?”

“Saan laeng a napintas no di ket kapipintasan…”

“Naangaw kadi amin a mannurat…?”

“Saan. Awan iti naangaw a mannurat ta disipulo iti kinapudno. Saanak a mamati ti kunkunada a love at first sight, ngem ita mamatiakon ta napadasakon. Agingga a dimo marikna ken mapadasan gayam, saanka mamati, saan?”

Nagkiriring ti selpon. Ni Yolanda!

“Ania? Mangiyawidak iti babai? Aaahhh, basi…Wen! Sangadram!” Nal-iten isturbo…hehehe!

Innalak ti selpon namber ni balo. Innala met kaniak. Agkarateks ken umawag no kua ngem diakon a sungbatan amangan no malipatak pay ni Yolanda ken dagiti annakko, nal-it ketdi.

Isu nga inyaramidak laengen iti daniw. ACROSTIC-ILUKO:

------------------------------------------------------------------

MARIA ARMIDA RILLERA

Mapidut la koma ti ayat iti langalang, awanen panagbisin ti lasag
Agbussog iti taraon nga agmawmaw ken pakatnagan derraas
Ridam kadagiti tebbag ket tallikudan a kas tuleng a makangngeg
Iti ulaw a lubong dagiti di makaawat ken dina kayat iti umawat
Asaken ti namaris nga essem iti balangkantis a ragsak.

Armida, narukop ti lasag ngem adda tulang ti muging iti
Ramiram ti makauram a kanito, ket nariknak dayta
Manipud kadagiti matam, iti lung-ay ken isemmo a kailiwko
Iti panagmaymasak, impasngayna ti bileg ken kalasag iti
Dangadang ti lasag ken kinapudno, iti rinnupak ti asin ken iti
Arak ti lubong; ngem ampaw ti ibaballaet, ampaw nga ibaballaet

Rikusen nga uli-uliten no kua ti litania ti pammati
Iti di maaramid a kari a pinarintumengan ken kinurnuoan iti
Liliteng dagiti di matimtimek nga imahen ti talek, dagiti
Ladawan ti kinasadino iti pagturongan ken yiikay iti
Eppes a panagdawa iti kinaasino. Armida, ti lukat a
Ridaw ti tebbag ti anniniwan dagiti isemmo isu nga
Aklonek a paay ti kinalalakik ti diak pannangan kadagiti saok
------------------------------------------------------------------------

Dayta man, kailian. Acrostic-Iluko. Daydiay umuna a letra dagiti binatog no basaen iti “pababa” ket adda ti balikas a kaimudinganna.

Paborito dagiti teacher ken dagiti pupils. Ngem saantayometten a pupils isu nga inaramatkon ti imagery imbes nga achmeism.

ACROSTIC
-ILUKO? Ala, ket padasenyo met a, kailian, total maymaysa laeng met ti kaipapanan daytoy: Panagsubli iti kinaagtutubo! Wenno reminiscence of long-long ago…

Balikas ita nga aldaw: Narukop ti lasag, ngem adda tulang ti muging.

Wednesday, July 12, 2006

ABCEDARIAN-ILUKO

narugiak met laengen iti agiposte kadagiti nadumaduma a rupa ti daniw, idiretsok man laengen...ta isunto iti iseryek iti kolumko iti Tawid...

Ket ita, adtoy met ti sabali manen a rupa: ABCEDARIAN-ILUKO

============================

Abcedarian-Iluko Dagiti Gikgik

Awan pusoda, nangatoda la unay
Basnotan ken lamotendat’ simmusoanda
Dangranda dagiti takiag a nagur-urokanda
Elohim! Elohim! Yikkisda, yikkisda ket
Gaburanda iti osana ti sarwada
Haleluya! Haleluya! Dida mauma
Idinto ta tuptupraanen kaadduan ti likudda
Jesus, awan anag ti lasag ken daram
Kadakuada iti panangilansadat’ krus nagligsayen initna
Lalatenda nga in-inuten iti inoras
Matayak la koman ikkis ti nagrangtayanda
Nga immulian iti tapaw ti bullalayaw
Pinisangdan telon ti napalabas iti
Ranggas a saan a pulos a madeppa
Sumangkamaysa dagiti kabagisna
Tulengda a makangngeg iti sanaang
Ulsanda laeng ti riknada iti manto ken
Wanes ti apuy ti barukongda….

Saturday, July 08, 2006

DODOITSU-ILUKO

ti la ketdi madandaniwen...ngem ala pinadasko man met daytoy a porma DODOITSU

5 man a DODOITSU-ILUKO

1. Nadara a Rabii

Ti telon napisangen
Ket nadaraan ‘kamen
Ta ginalip ni manong
Pasmok a rabong

2. Nawaw ti Nabudo

Ket inkurkurnat’ budo
A kurang ni Abundio
Gineppas kanalbuong
Ti telon-basol

3. Tallo Nga Anniniwan Iti Sellag

Narga’y pempem garami
Iti anangsab ‘ti dua
Napnek dag’ti naannad
A matat’ sibeg

4. Iti Sirok ti Bangsal

Ti ungor ti dissuor
Nangawis iti puor
Ket nabukirad matat’
Lakay nabbasa

5. Misterio Iti Kasabaan

Napnekda apagbiit
Nawayadanto manen
Inton makaawiden
Sangailida

----------------------
DODOITSU daytoy ti detaliena...ngem no siak laeng met iti masurot a ket, apay a dipay la awagan met iti IDDOITSU? hehehe! ania ti makunam, kailian? ala, padasem met a...

Thursday, July 06, 2006

Daniw man met

irony a talaga...tsk..tsk.tsk...ti daniw a mammagbaga ti maysa kadagiti kasimronko a daniw, ngem apay itan nga agdaniwak iti mammagbaga? ala,agbasbasa met no dadduma ni Danilo ditoy blog a kas iti nasaona iti naminsan... awan iti makunak iti kasasaadna no di laeng daytoy, inawagak iti daniw (uray no sinsinan a daniw)... saan amin nga aldaw ket katutudo, Danilo, adda met ti kalgaw...

+++++++++++++++++++++++++++
------------------------------------------

Dagiti Puraw a Rabii ni Danilo


Saan a dayta panagurok iti katapokan
Ti makaay-ayo a pakasaritaan
No di ket ti ibabangon manen
Kas iti naamitan iti let-ang ken langalang
Ti nalikudan ket lasag pakasaritaan

Ti panagaddang ket panangsapul manen
Ti narangrangen a bituen
Kas iti awirmo nga umis-isem
Ti abut ti dagum ket usokem
Tapno ibanderam pennek a narangen

Isu met ti kunada, ti panangpunas ti tugot
Ket aramid a naannugot
Ti panagbiag iti napalabas ket panaglumot
Iti karayan ti allilaw ken biddut
Misuotan dayta daydi kaingungot

Apay a sapulem daydi Marieta
Kadagiti ulimek ti agpakada a malem
Ken kadagiti sawimeng iti parbangon
Mulagatam laengen ken arakopem ti kinapudno
Nga agin-indayonen isuna iti daniw a narangen…

Saturday, July 01, 2006

Hailstone

Limmamiis bassit ti siudad. Ngamin itay nabiit, nagtudo iti hailstone. Ama,ket dagiti saan a makakitkita iti hailstone a ket masdaawen a ta apayen nga agtudon iti yelo? Adu ti naayatan a nagpidut, idinto ta nagsardeng met dagiti lugan.

Iti rigatna daytoy a hailstone no dadduma, gaburanda dagiti mula a repolio, wombok ken dadduma pay. Ket inton aginit, makset metten dagiti mula, ket minillion manen ti pategna a nateng ti madadael.Lalona sadiay partena ti Atok a kalalam-ekan.

kastoy man ti buya ti HAILSTONE:

no limmamiis bigla, panagruruar met ti trangkaso ken rayuma yusot! isu nga agpilay man dataon, hehehe!