Friday, December 15, 2006

DANIW

Dagiti Dumandanog iti Angin

babawikon a timmamdag
di laeng nasulek no di ket nakidag
kadagiti ebanghelio a naidasay-napasag

ti paitna, imbaagdat' ipusda dagiti tayaktak
dagiti awanan rupa a kutak a kutak,
naladaw a bimmangon, saradat’ nagluptak

awan serbi ti ibabatok iti estero,
no marugitan met laeng dayta ulo
iti awanan kaimudinganna a senakulo

ta kasano koma nga ambingam ti diaya
a kalpasanna nga awatem koma ket isakmolna
wenno isalakanna met laeng a kanen sarwana

iti sumsumiag a panawen ti haytek
di maturog ken paudi dagiti inigges nga utek
a di makaamiris iti badang a nagballatek

kadagiti balikas nga inibbatan
ti katatao a nailamina-nailadawan
di ngarud naimbag agespeho iti narikian

ala, wen, makaipasda iti nakem
kas iti beinte nuebe, addaan dua a tadem
ngem di mabtak ta ulom no bumatokka iti adalem

agrupsa ti lasag, agkitemda iti malem
ngem ti kinabalasubas itugot iti tanem
ket dikanto masinit no adaywam ‘ta temtem

ay, ania la ketdin aya, dumandanogda iti angin
dagiti inangin a tuktok a di makailasin
iti puraw a darat ken naapgad nga asin

di makaamiris, di makaawat, agkalkallautang
dina ammo nga agnanayon ti lawag ti tangatang
ken agpukaw ti anniniwan ti langalang

3 comments:

ariel said...

Nalagsat dagiti binatogmo, Ka Jim! Nakabunbun-as!

jim agpalo, jr. said...

nabasak diay postem iti blogmo, ka ariel, ket napanak met timman-aw iti sigud a pagannninawan ngem kas iti buya iti iraq ti naimatangak... isu a sinuratko daytoy a daniw tapno maiyebkasko met ti sainnek ta dinto ket maullom iti barukong nga isu pay ti dagensen no maluom nga agdumdom...

tommy said...

Ayna apo! Saanak unay nga makareleyt ket nu tutukak dagiti henyo. Napaspaspas kay pay nga agsuraten manong ariel ken manong Jim ngem ti panagbasakon!