Thursday, September 14, 2006

DANIW

Nalisiak Manen Ti Kumpay Ni Patay

ngem, ammok, saan nga agnanayon ti isem
kas iti daniw, aggibus inton magsat puseg ti angin
inton agin-iniin a matnag ti naragas a bulong iti daga
ket iti naulimek a lennekan, in-inut nga agtabon ti init
ala wen, ti kinakolumnista medikal ti salakan
iti lib-at a wasiwas ti kumpay ti nakaabungot
a rurog iti beddeng ti gunay ken talna
kunak itan, pak-ol ngata wenno pakdaar
panagsagana iti ibaballasiwen iti kinatalna
ta nakitakon ti biddut a panangitandudo ti dir-i
kadagiti amin a suli ti manglimlimo a talek
ket nalipatan ti litania ti umuna pakdaar
ti di naitaltalek a lib-at, ti ganna, ken ti mision
dagiti daniw, sarita ken sinurat a nasilawak
iti aksidente a pannakatnag iti dan-aw ti balikas
kayatko nga itakdang ida, isuda amin, itan, koma
ngem dandanin naisurat ti tallopulo iti papel
ket daydiay kabaelan ti muging di kabaelenen ti lasag
siguro, apitekon ti bunga dagiti bukel ti biddut
nga intukit ti kinalalaki iti bangkag ti kalman
dagiti bukel a nangitag-ay iti agusaw a bileg
dagiti bukel a sugsog iti kulkol a dana
dagiti bukel nga abungot ti padeppa
dagiti bukel a button ti konsensia
dagiti bukel a timtimonan ti agdama
iti sab-ok ti ulimek, nagampayag ti muging
kadagiti kinelleng nga inasak ket sinapul
dagiti sungbat ti saanen a magaw-at nga isem
pinanid ti panangbasak ti libro ti historia
ket nakitak dagiti namituen a kinelleng
dagiti natibtibong a bangkag ti dir-i
nabatida amin, wen, anian, nabatida amin
ket dayta a kanito, inagaw ti ubbog ti mata
ti kanalteek dagiti ramay iti keyboard
maipasngayak koma manen! wen, koma
no adda maulit a maipasngay ket subliak
dagiti kari dagiti namituen a kinelleng
dagiti kari dagiti natibtibong a bangkag ti dir-i
ngem ammok, itoy a kanito, umang-angesak
iti sabali a lubong, iti sabali a panawen
ta agrupsa ti amin a pigsa, ti lasag
adda met panakabannog ti muging
agpukaw met ti maris ti bullalayaw
dumteng ti paksoy, ti babawi, ti duadua
ti ladingit, ti sugnod, ti lunod, ti napait a lua
diak masinuo ti kalawa ti tangatang ti alla
makabannog, makabannog, ti upay, ti biddut
ti nangisit ti ulep iti nalidem a lennekan
ket ti nabatbati a pigsa, ti tibker ti muging
ad-adda a sapulennan ti talinaay…

7 comments:

jim agpalo, jr. said...

naimpusoan a panagyaman kada: Dr. Aga Yaranon ken Dra. Ma. Elizabeth Tumada-Espiritu iti panangilisida ti tengnged iti gerret ti kumpay ti nakaabungot a rurog...Agbiagkayo!

ariel said...

ania daytoy a pasamak, ka jim?

dakilangugat80@yahoo.com said...

adda imas ti ridep; awisna ti gumuyugoy
sumubli dagiti namaris a laglagip, namarmaris manen ti isem ti mutia ken ti imnas;

kutiem laeng dagiti ramramay
tapno saanka a maikursong iti lubong
ti batibat ti sipnget

rumuk-at wen, rumuk-at ti nagtagiabungot a dakkel ti matana
matunaw ti iggemna a kumpay
ti biag ti anges...
adda nayonna

ariel said...

hey, jim, come on. where are you?

jim agpalo, jr. said...

guray biit ta jak makapagpaut iti sangot pc...agpapigsaak la biit

ariel said...

ala, dika ngarud aggangganat, kabagis. importante ti regta ken pia ken karadkad. ipatulodko dagiti enerhia dagiti anito a makapalaing ken mamaglaing iti duggiar ti bagi ken isip ken panunot ken kararua.

dakilangugat80@yahoo.com said...

silpuan ti karadkad
dagiti inana ken
dagiti kararag

nasustansia a taraon
ti isip ti prescription
ti panagtalna iti suli
mabiit a panagkidem
kadagiti mata

isilpom ti utek
ti langa ni Jesus
nalag-an dayta
narayray dayta
lawag iti appupo
ti init ti biag

anges, wen, anges
nga agsubli
isem dagiti bibig
ni kasimpungalan
iti nangato a namnama
dagiti saringit

agkidemka:
mabukelmo ti ladawam
ti Apo
ti Kinaindaklanna
a mangngagas
ken mangted iti
amin a pakabuklan ti
medisina ti bagi,
ti panunot
ken kararua

dayta
ti umat-atiddog
a


b
i
a
g

ken

b
i
l
e
g

iti sappuyot

ti Dios Apo