Wednesday, October 26, 2005

1st National Saribitniw Contest

1st National Saribitniw Contest, Naangay



BALLIGI! Dakkel unay a balligi ti napasamak a 1st National Saribitniw Contest wenno Umuna a Nailian a Salip ti Saribitniw, a naangay sadiay New Pavilion, Regional Education Learning Center, California Ave, San Vicente, San Fernando City. Ti dua nga aldaw a pasken ket naangay idi Oktubre 22-23, 2005.

Toy numo toy biang ti maysa kadagiti nagpaay a hurado ken naglektiur maipapan iti panagsuratan iti saribitniw (declamation), sarita, bitla ken daniw.

“KOMA kabaelak met iti agsurat, iti kas iti kinalaingyo a mannaniw,” daytoy man ti essem iti bitla ni Mayor Mary Jane C. Ortega, City Mayor ti San Fernando, La Union ken kangrunaan a sangaili.

“Kiddawek laeng kadakayo a mannurat a suratenyo koma dagiti banag a mangitag-ay ken mangidur-as ti bukodtayo nga ili ken pagilian, mangitag-ay ti kulturatayo nga Ilokano ken panangitandudotayo kadagiti napipintas a kababalin ken ugali ni Ilokano,” innayon pay ti mayora.

“Tinawen koma daytoy a pasalip, tapno bumaknang pay ti bukod a literatura,” tinarigagayan met ni Dionisio S. Bulong, Coordinator for Northern Luzon, National Commission for the Culture and the Arts ken isu pay ti presidente ti GUMIL Filipinas (NCCA) a nangsuperbisar ti pasken.

Ti pasken ket inangay ti Sir Pelagio Alcantara Development Foundation (SPADE) ken ti NCCA, ken ti itutulong ti Provincial Government of La Union, City Government of San Fernando, STI-College-San Fernando ken ti GUMIL La Union.

“Maragsakanak man unay iti mapaspasamak a taripnong dagiti mannurat. Makaaw-awidenakon!” kuna met ni Terry Gabriel Tugade, nga immawag iti telepono ken nangesponsor iti On The Spot Poetry Writing Contest.

“Ania ket ti laingyon, nakakaapal!” insakuntip met ni Lorenzo Tabin, nga immawag met babaen iti telepono.

Agpada a panuli ti literatura Ilokana da Tugade ken Tabin ken agnanaeddan sadiay Estados Unidos.

Sakbay a napasamak ti national contest, immuna a naangay kadagiti provincial level babaen iti itutulong dagiti provincial chapters ti Gumil Filipinas. Dagiti kampeon dagiti probinsia, isu ti nagsasalip iti national level.

Dagitoy dagiti kampeon dagiti probinsia:
1. MARIO TEJADA, Kampeon ti Ilocos Norte
“Agawidakon, Patti!” ti pinangabak a piesa pinangabakna iti salip a naangay iti Currimao, Ilocos Norte. Agdama a department head iti Piddig Municipal Government ni MTT. Nagturpos iti B.S. Commerce iti Divine Word College of Laoag ket mangal-ala iti masteralna iti Mariano Marcos Memorial State University.

Premiado a mannurat iti Bannawag. Nakagun-od iti maikadua a gunggona iti Iluko Short Story Writing Contest ti GUMIL idi 1982. Agdama nga Oditor ti GUMIL Ilocos Norte. Uppat ti annakda ken ni sigud a Lilia Andres ti Tonoton, Piddig, Ilocos Norte: da Marlo Joy, Ariel Paolo, Rashela Yanina ken Mara Ira Patrice. Agnaed ti pamilia Tejada iti Anao, Piddig, Ilocos Norte.

2. MARCIELITO S. TACADENA, Kampeon ti Ilocos Sur. Inyalatna ti kampeonato a naangay iti Marinella Complex, Metro Vigan, Ilocos Sur babaen iti manuskritona a “Para iti Sapasap a Balligi”.

Nagturpos iti University of Northern Philippines iti kurso nga AB Mass Communications. Iti tawenna a 23, agdama ita a news reporter ken scriptwriter iti National Broadcasting Network (NBN 4 Vigan) ken kameng ti Hunta Direktiba ti Ilocos Sur Integrated Press. Taga Namruangan, Cabugao, Ilocos Sur.

3. FERNANDO B. SANCHEZ, Kampeon iti Pangasinan Nangabak ‘toy nalatak a mannurat ken mannaniw iti Iluko iti napalabas a Provincial Saribitniw Competition a napasamak iti Information Center, Nagsaag, San Manuel, Pangasinan.

Agdama a principal iti San Nicolas Elementary School, Pangasinan ken OIC District Supervisor ti DECS. Ni FBS ti nakagun-od iti kangatuan a gunggona iti napalabas nga eksperimental a pasalip ti Saribitniw a naangay iti National Press Club, Intramuros, Manila itay napan a tawen, kabayatan iti maika-36 a kombension nasional ti GUMIL Filipinas.

4. ROLAND A. ALMOITE, Kampeon iti La Union
“Kinaubingak ni Rigat” ti piesa a pinangabakna iti pasalip a naangay iti La Union National High School, San Fernando City.

Iti napalabas a pasalip ti saribitniw a naangay iti National Press Club, Intramuros, Manila, itay napan a tawen, nagun-od ni RAA ti Pangliwliwa a Gunggona. Isu ti agdama a bise presidente ti GUMIL La Union ken kapitan ti barangay Say-oan, Bacnotan, La Union. Radio announcer ti DZNL ken nagturpos iti kina-agricultural engineer iti DMMMSU.

5. LAWRENCE DECENA MARTIN, Kampeon iti Isabela
“Kaano nga Agsubli ti Kulalanti, Tatang Salustiano?” ti piesa a pinangabakna ‘toy tubo ti San Agustin, Isabela.

Ti Governor Roque Ablan Awards for Iloco Literature (GRAAFIL) ti umuna a literary awardna, iti panangabakna iti Maikadua a Gunggona iti salip iti daniw nga impablaak ti Bannawag. Nangabak itay nabiit ni LDM iti Pangliwliwa a Gunggona iti pasalip ti TESDA a sarita maipanggep iti programa daytoy Technical Vocational Training.

Tubo ti San Agustin, Isabela, naipasngay idi Enero 23, 1977 kada Salustiano P. Martin ken sigud nga Anastacia P. Decena.

6. LUVIMIN T. AQUINO, Kampeon iti Baguio-Benguet
“Sirmata iti Kasipngetan” ti pinangabak ni Luvimin T. Aquino iti kallabes a pasalip ti Saribitniw iti Benguet a napasamak iti Sato Kokusai Lecture Hall, Patria de Baguio, Baguio City. Drama Production Supervisor ti Mt. Province Broadcasting Corporation (DZWT).

7. ALEJANDRO C. MATINEZ, JR., Kampeon iti Abra
“Barangay a Kababaan: Panagkunniber Awanan Simpakawan” ti pinangabakna. Mangisursuro iti Tagudtod National High School, Lagangilang, Abra. Agdama a bise presidente ni ACM Jr. ti GUMIL Abra.

Saan a nakadar-ay iti pasken ni Almoite ken ti agnagan iti Dr. Acoba iti Nueva Vizcaya. Nalabit nga iti sumaruno a salisal...

Computerized ti tabulation dagiti score, babaen iti tulong ti STI-College, San Fernando City babaen ken ni Engr. Antonio P. Alvarado ken dagiti estudiantena. Agaaddayo iti uppat a metro dagiti hurados, tapno masigurado a kabukbukodan ni hurado ti keddengna, ken addaanda iti saggaysa a kompiuter a nakakonekta iti kompiuter (home networking) ti secretariat ken timer tapno maamuan a dagus ti resulta.

Nagkadua ti salip: iti written ken iti oral. Iti oral iti naghuradoan toy numo toy biang. Dagiti nangabak:

Umuna a Gungguna: Fernando B. Sanchez, ti Pangasinan; Maika-2 a Gungguna, Mario Tejada, Ilocos Norte; Maika-3, Luvimin T. Aquino, Baguio City. Dagiti consolation prize: Lawrence Decena Martin, Isabela; Marcielito Tacadena, Ilocos Sur; ken Alejandro C. Martinez, Jr., Abra.

Kaduak a naghurado da Prescillano N. Bermudez, (chairman ken kamengkami kada) Edilberto H. Angco, Peter La. Julian.

Dagiti nangabak iti T. Gabriel Tugade Foundation On The Spot Poetry Writing Contest, a ti tema ti nagsasalipan ket ti: “Akem ni Mannaniw iti Agdama a Mapaspasamak iti Gimong”: Umuna a Gungguna, Leonora T. Corpuz; maika-2 Letty Astudillo-Aquino; ken maika-3, Danilo Caburian.

Kaduak a naghurado da: Prescillano N. Bermudez, (chairman) ken Edilberto H. Angco.

Ti premio ti Reynald Antonio Awards for Iloco Literature 2005 Salip ti Daniw ket naited iti nasao a pasken: Umuna a Gungguna, Danilo Caburian; maika-2 Gungguna, Edilberto H. Angco. Dagiti dadduma a pay a nangabak: Lorenzo Tabin, Dexter Fabito ken Agustin DC Rubin. Kaduak a nangiyawat ti premio da Caburian ken Angco ni Prescillano Bermudez, idinto ta naidulin ti para kadagiti dadduma.

Kaduak met laeng da Prescillano N. Bermudez ken Edilbereto H. Angco a naglektiur iti sarita, bitla, daniw ken saribitniw. ##

2 comments:

rva said...

kablaaw kadagiti nangabak!

mang jim, ni apo rogelio "mac" acoba daydiay "agnagan iti dr. acoba" a nakadkaduami idi iti gumil nueva vizcaya, aglalo idi aktibo pay ti "gumil-ayab" a pagiwarnak ti gnv. nangab-abak iti pasalip iti sarita ken drama iti graafil ken gumil hawaii ni apo acoba idi 1983. nalaing a mannurat, ken college propesor iti agrikultura. agpayso ngata a nagback-out?

jim agpalo, jr. said...

kasta ti nasagapko a damag...

ngem nalabit a saan a napakaammuan iti umno a detalie maipapan itoy...

wen, ammok ni apo roger, maysa kadagiti sursurotenmi ti tugotna bareng lumaingtayo met nga agsurat...

napintasto la ketdi ti sumaruno a salisal no ibagianna ti NV... napintas ti salip, a nagkadua a kategoria: written ken oral, santo nasuma iti maymaysa. Itoy a salip, ipasngayna met dagiti nalaing nga orador, bumibitla, sumasarita ken dumadaniw iti entablado.

ti pasken ket inangay ti SPADE ken NCCA iti tulong dagiti GUMIL Provincial Chapters.

kaniak a biang: ti declamation ket maysa nga hypothetical ken imitation (indirect wenno direct) iti maysa a banag wenno pagteng iti nagkatlo a paset: sarita, bitla ken daniw. (isu a saribitniw). Iti sarita, saan a maawan ti tao, lugar ken pasamak; introduksion ken argumento met iti bitla; ken daniw a kas daniw a resolution wenno summation wenno conclusion ti tema.

Iti paliiwko, napaka-specific a saribitniw. Nupay paset ti kanta wenno kansion ti declamation, saan a mairaman itoy a salip a kas iti sinurat ti maysa a nakisalip. Ti salaysay ket saan met a paset. Ketdi adda ti arte ti story telling, arte iti bitla (speech) ken arte iti panagiyebkas iti daniw. No masurot dagitoy a ket, bumaknang ken bumaknang latta ti literatura ni saluyot (a kas iti nakunak iti lektiurko, ta dimmikar ti essem a kas maysa a kritiko)

ala ngarud, isaganaantayon iti sumaruno a salip!