Monday, August 15, 2005

Kenka, Metaphor Man

Kenka, Metaphor Man



ti arigengen idi, ti naitagbat a layat
dimi nalansad ti intalukatikna
ta maysa a burtia dagiti burburtia
ket ti natali a dila ti durog
tapno batokenmi dagiti latok ti bersom
ngem dimi nabatok ti perlas
a sungbat dagiti ngatangata
(anian, kunami, ngem itoy gundaway
ti kabaelan ti utek ket di kabaelan ti dila)
ketdi iti bulsat’ mugingmi agbarbarakebek
ken agtultuloy latta ti agus
ti baresbes ti pammatimi
nga ad-adda a sika ti metapora
ngem kadagiti bersom
itan ta intig-abmi’t raman salaysaymo
nariknamin ti bileg ti layat
a sika ti metapora, sika pay ti berso
sika ngarud ti metapora ti berso
sika, wen, sika a nangitagbat
ti layat tapno magsat ti puseg
dagiti di makaammot’ bagida a migrante
wen, migrantetay’ amin, metaphor man
iti lubong a gandiong, gandiong a lubong
ket wen, apay a yabagam ti lubong
a dimo met kukua, no di ket kuakua
dagiti gandiong a naibelleng laeng
iti lubong a gandiong
ti kukuam ket ‘ta bagim
lasagmo dagiti bersom
kararuam dagiti metaporam
ala, ket, purosen ken itukit latta
dagiti metapora kadagiti berso
ngem dimonto koma itagbat
a tallopulo ti metapora ken bersom
ta dikamto ket agmangisit
ken agngatangata ken agtangatanga
nga agiliw iti inudo ti rissik
dagiti metaporam ken dagiti bersom
nga ali dagiti ingpen ken essem
metaphor man, saan a mabannog
ti kararua nga agikurkur-it
kadagiti sadiwa a metapora iti dana
ti biag, ngamin saan a naited
dagiti balitok a manmansion
ken balitok a bambantay
ken balitok a karkarayan
ken balitok a baybaybay
ken balitok a dagdaga
ken balitok a law-ang
no di ken naited dagiti daniw
ken kansion a pagapitan
kadagiti metapora
ti napudpudno a biag
wen, metaphor man, saan laeng a sika
ti di nakasiray ti anniniwan
ti agdan a puraw nga ulep
iti sallukob dagiti nangato a bakud
ti seminario, no di ket adu, aduda pay
isuda dagiti nagapit met kadagiti metapora
iti daniw ken iti nobela ken iti sarita
saan a daydiay awis ti nabileg nga abut
a ridaw-sumrekan iti gandiong a lubong
ta para laeng dayta kadagiti gandiong
ta mabatinto amin a banag
iti gandiong a lubong
dagiti nagtaud iti gandiong a lubong
inton serkentayot’ maikadua nga abut
a ridaw-ruaran iti gandiong a lubong
ta rumbeng laeng nga ited ken ni cesar
ti para ken ni cesar ….
ala, ket, purosen ken itukit latta
dagiti metapora kadagiti berso
ngem dimonto koma itagbat
a tallopulo ti metapora ken bersom

ars longa vita brevis...!

1 comment:

ariel said...

Dear Jim:
What an art! thanks metaphor man!
Ariel