Thursday, June 30, 2005

Nadangro Latta Ti Anglem

Nadangro Latta Ti Anglem

May dires Apong:
dida met naulaw iti ingelna
kadagiti medios a balikas
a sukal nakabatbati nga aningaas
ken naan-annongan a panagserbi
dagiti agiikkis a bambanti
iti entablado a gimong?
Ing-ingatan ken itiktik-abda met
dagiti moromoro a sael
puon katawadat’ pinniltak-rupa
ken pinnangatot’ isbo?
Wenno naimiun ngatan a, dagiti urat
dagiti sal-at ket didan mabatok
ti ladawan ti siit iti ulila a latok;
didan matimud ti dung-aw
ti tumaytayab a pagaw;
dida maidasig ti uged
ti linas iti puseg?
‘Pong, ibuyogmo kadin a,
iti angin dagiti Balikasmo
a padapad dagiti tongaw;
dagiti balikas a puon
dagiti raya ti agsapa;
dagiti balikas a taud
dagiti karrusing a rettab…
‘La kadin a, ‘Pong, iburaymon
dagiti addang ti isem
a sebseb ti semsem;
ta, ne, malemen, malemen
ngem nadangro latta ti anglem…


JAIME M. AGPALO, JR.
Brgy.San Antonio, Narvacan
Ilocos Sur
ref="http://kamalig.blogspot.com/">KAMALIG

No comments: