Saturday, June 11, 2005

MAKISALIPTAYO, KAILIAN!

SARIBITNIW --- sarita, bitla ken daniw--- wenno declamation...

ala ngarud kailian, padasenyo, ngarud, good luck!
UMUNA A NAILIAN A SALIP TI SARIBITNIW


Maluktan ti Nailian a Salip ti Saribitniw iti bulan ti Hunio, 2005 nga iyusuat ti Sir Pelagio Alcantara Development (SPADE) Foundation babaen ti panangesponsor ti National Commission for Culture and the Arts (NCCA) ken ti pannakitakunaynay ti GUMIL Filipinas ken dagiti maseknan a probinsia.

Maysa nga eksperimental a porma ti Literatura Ilokana ti Saribitniw a buklen ti nagtitipon a sarita, bitla ken daniw maipanggep iti maymaysa a tema. Maisarita-maibitla-maidaniw ti suheto iti las-ud ti makedngan a tiempo. Minuli daydi dios-ti-aluadna a Pelagio A. Alcantara ti saribitniw ket itultuloy ita agiti kameng ti pamiliana ken nasinged a kakabsatna iti pluma. Kalikaguman daytoy a pasalip ti tumulong a mangpasantak iti panagdur-as ti Literatura Ilokana ken ti nariingan a kultura.

Dagiti pagannurotan:

1. Silulukat ti salip ti Saribitniw kadagiti amin a mannurat nga Ilokano nga agnaed ditoy Pilipinas malaksid kadagiti kameng ti SPADE Foundation ken dagiti agraman pamiliada agraman ken dagiti kameng ti sekretariat ti pakontes.

2. Maangay ti kampeonato a salip iti sigud a Wallace Air Base, Poro Point, Siudad ti San Fernando (La Union) iti maika-22 ti Oktubre, 2005 a pagbabalubalanto dagiti nangabak iti elimination round ti sangapulo a probinsia. Seminar-workshop para kadagiti dadduma a napili ti maaramid iti maikadua nga aldaw.

3. Tallo a bulan ti maited a pawayway kadagiti agregget a makisalip manipud pannakaimaldit wenno pannakaiwaragawag daytoy a pakaammo. Masapul a makadanon kadagiti SPADE-designated provincial headquarters amin a maisalip a manuskrito iti saan a naladladaw ngem Agosto 31, 2005. Saanen a mairaman iti pasalip dagiti maawat a manuskrito kalpasan dayta a petsa.

4. Addaan ti dua a paset ti pasalip – ti panagsurat (writing) ti manuskrito a maisumite kadagiti provincial SPADE headquarters ken ti panangibasa (reading/oral delivery) ti sinurat. Dagiti laeng tallo a napili a manuskrito ti maibasa iti elimination round nga atenderan dagiti lokal a hurado ken bisita iti nakaiskediul a petsa iti probinsia. Ti umuna a kapintasan a mapili a manuskrito ti mairaman iti kampeonato a salip ti saribitniw. Dagiti autor ti maikadua ken maikatlo a napili ket esponsoranto ti probinsia nga ibagian dagiti autor a mairaman kadagiti duapulo nga agseminar-workshop maipanggep iti panagsurat ti saribitniw. Piliento ti SPADE dagiti aglektiur babaen iti masurot a proseso.

5. Maipanggep iti irarang-ay ti biag (poverty alleviation) iti napudno ken natan-ok a wagas (anti-corruption) ti sentro ti tema ti saribitniw. Maibinggas iti tema ti panangipateg iti nariingan a kultura (cultural heritage) ken pannakasaluad ti aglawlaw (environmental protection).
6. Agatiddog ti sibubukel a saribitniw iti 15-25 a panid. Masapul a maimakinilia wenno maikomputer ti entry iti regular a bond paper (short) ket nasken nga adda margin a maysa a pulgada iti amin nga igid ti papel.

7. Saan a nasursurok ngem 20 a minuto ti kaatiddog ti maiparang a Saribitniw. Dagiti laeng pasetna a bitla (10 a minutos) ken daniw (10 minutos) ti maibasa iti tallaong.

8. Maiwayat ti elimination round iti sangapulo a probinsia ti Kailokuan, agraman Metro Manila manipud Setiembre 2005 agingga iti Oktubre 2005. Dagitoy ti schedule ti panagpili kadagiti naisalip a manuskrito ti saribitniw kadagiti maseknan a probinsia: Abra - Setiembre 24; Metro Manila - Setiembre 25Ilocos Norte - Setiembre 10; Ilocos Sur - Setiembre 11; La Union - Setiembre 17; Pangasinan - Setiembre 18; Cagayan - Oktubre 2; Isabela ken Quirino - Oktubre 1; Nueva Vizcaya - Oktubre 8 ken Benguet/Baguio City - Oktubre 9.

9. Maysa laeng nga entry ti mabalin a maisalip. Ipaw-it ti pakisalip a manuskrito iti uppat a nadalus ken nalawag a kopia ket masapul a maawat daytoy iti saan a naladladaw ngem alas 5:00 ti malem ti Agosto 31, 2005 dagiti coordinators ti SPADE-designated headquarters iti tulong ti GUMIL chapter nga adda iti maseknan a probinsia. Awan ti agparang a nagan ti autor iti entry. Pakuyogan ti pakisalip iti narikpan a sobre a naglaon iti Paulo ti saribitniw a pakisalip, nagan ti autor, ababa a pakasaritaan ti biag, retrato a 2”x2”. Iraman iti impormasion ti petsa ti pannakayanak, agdama nga adres ken numero ti selpon weno telepono.

10. Ikoreo, iyemail wenno idatag a personal ti pakisalip a manuskrito kadagiti sumaganad: Abra – Prescillano N. Bermudez, c/o Information Center, Bangued, Abra; Benguet/Baguio City – Clarito de Francia, c/o University of the Cordilleras, Baguio City; Metro Manila – Cles B. Rambaud, c/o Bannawag, Manila Bulletin Publishing Corp., Manila Bulletin Bldg.,, Muralla, Corner Recoletos Sts., Intramuros, Manila ken ni Angel R. Calso, c/o RIMAT, No. 58, Road 7, Project 6, Quezon City; Ilocos Norte – Elizabeth M. Raquel, Pinili, Ilocos Norte; Ilocos Sur – Edilberto H. Angco, c/o Sirmata, Marinella Complex, Metro Vigan, Ilocos Sur; La Union – Crescencia R. Alcantara, Namnama Village, San Fernando City; Pangasinan – Manuel S. Diaz, Nagsaag, San Manuel, Pangasinan; Cagayan – Vilmer V. Viloria, Provincial Government of Cagayan, Tuguegerao City; Isabela ken Quirino – Dir. Baldovino Ab. Valdez, P.O. Box 15, Alicia, 3306, Isabela ken Nueva Vizcaya - Ruperto Manuel, Agrisector Bldg., Capitol Compound, Bayombong, Nueva Vizcaya.

11. Dagiti Premio ti kampeonato a salip: Umuna a Gunggona – P10,000.00; Maikadua a Gunggona – P7,000.00 ken Maikatlo a Gunggona – P5, 000.00. Tallo ti mapili a Pangliwliwa a Gunggona a sag-P2,000.00 kada gunggona. (Mairaman iti premio ti 10% tax a maikissay kadagiti premio nga aggatad iti P10,000.00 wenno nangatngato). Malaksid iti premio a kwarta, maikkanto pay amin a mangabak iti maikwadro a sertipiko ti pammadayaw. Kas nayon dagiti maawat a premio, addanto pay maited a sertipiko ti libre nga innem a bulan a suskripsion ti Ilokano nasional magasin kadagiti mangabak ti umuna, maikadua ken maikatlo a gunggona.

12. Saan a mabalbaliwan ti nangabakan a manuskrito. Daytoy met laeng ti maisalipto nga entry para iti nasional a pakontes. Nasken ngarud a maawat ti SPADE Foundation dagiti nangabak a manuskrito iti saan a naladladaw ngem Oktubre 15, 2005.

13. Dinto maibabawi ti pangngeddeng dagiti Hurado.

14. Amin nga entries a maisalip agbalinto a kukua ti SPADE Foundation. Mailibro dagiti mangabak a manuskrito ket maikkanto ti kopia ti National Commission for Culture and the Arts (NCCA).

15. Para iti nayon a palawag maipanggep itoy a pasalip, kontaken laeng ti SPADE Foundation iti tel. blng. (072)7005755; cp no. 09215337599; email: spade_bulletin@yahoo.com. Wenno agsurat iti SPADE Foundation, c/o No. 4, Acacia St., Namnama Village, San Fernando City (La Union).

__________________
Approved for dissemination by SPADE Foundation, Inc., June 08, 2005

1 comment:

asseng said...

manong, No. 58 ti adres ti RIMAT.