Saturday, December 18, 2004

DANIW LATTA...

Aminek, naginana ti musak...nabayag a pinagpaadaanak iti isusublina...adu a remedio...ngem awan latta...ngem kalpasan iti pannakabasak kadagiti dandaniw ni Dr. Ariel S. Agcaoili, ne, nagsubli ketdin ti musa...saan laeng a daniw no dipay ket iti sarita...nabileg dagiti balikas ni apo Ariel, a saan laeng nga iti sangrat ken nakaisangratanna no dipay ket antidote iti sugnod ti nagpasugnod, hehehe!...isu a dumaniwak manen...adtoy ti sungbatko iti daniw ni apo Ariel....

************************************************************************************************

Kurarayan a Pluma: Para ken ni Dr. Ariel S. Agcaoili
(sungbat iti daniwna a The Poet of the Voice of Our People Lost)


wen, ayi, agpadaya manen dagiti kannaway
iti leggak, a sumakdo iti leggak dagiti balikas
dagiti balikas a silaw ti naamitan a teggaak
ti rabak, ti teggaak saanen a rabak

no di ket babak, babak nga allilaw
allilaw ‘giti nakatugaw, nakatugaw a sallapingaw
a nangiduol iti lugaw, lugaw a kalawakaw
kinawkaw a lugaw ken sinimot a sagpaw

iti away a kapanagan, kapanagan dagiti kannaway
kannaway agwarsida iti diket a bagas dagiti balikas
balikas a nabagas, atang a berso a nakasarukang
nakasarukang a siit karabukob dagiti garamugam

garamugam, garamugam a nairuam
nairuam a mangitik-ab lua ti kaadduan
kaaduan, kaaduan nga aglulua
aglulua ta awan ti itik-abna

ken wen, ayi, dagiti bulong ti algarroba
agdeppada manen iti bigat
deppaanda dagiti rigat
rigat a pinanawanen ti bigat

bigat a binagkat dagiti saanen a mabagkat
a ladawan ti kaadduan, kaadduan a ladawan
ladawan no apay nga indisso ni Nelia
ti korona ti katkatawa, ti nakakatkatawa a korona

korona a balangkantis, liwliwa a tirtiris
tinirtiris a liwliwa, liwliwa nga allilaw
dagiti buaya a nakatugaw, nakatugaw a pasaw
a dina ammo ti saraaw, wen, saraaw

saraaw a makaulaw, makaulaw
a kari dagiti nakatugaw, intayab ti ullaw
ullaw dagiti ulaw, mangkik, bullagaw
ken dagiti naglapayag iti puraw ken duyaw

wen, ayi, dagiti tuwato ngumato manen tayabda
tapno agbirok tayab ti agsapa, no adda pay agsapa
dagiti annak ni Angkuan, Angkuan a nagraranggasan
a pinagraranggasan dagiti garamugam

garamugam a rumbeng a warsian iti bagas
nga atangan iti daradara a balikas
balikas ti berso nga agtungtunglab
a tinunglab dagiti antukab a balikas

balikas nga isarukang, isarukang dagiti balikas
dagiti binatog ti bua a lua, lua ti bua a naibinatog
luppo ti kawitan a berso, berso dagiti managberso
arak a dugsak, dugsak dagiti sariwakwak

di lipatan binagkal a binatog ti akkal
akkal ti gawed dagiti tiwed
tiwed a ngednged babassit a tengnged
tengnged dagiti tiwed ket siniten

sigarilio a naingel, ingel dagiti maingel
a mangsaka iti kararua ti naidalit nga ili
ili a nakasalapon iti sirok ti baliti
baliti dagiti di katawtaw-an iti ili

wen, ayi, agpadaya manen dagiti kanaway iti leggak
agdeppa manen dagiti bulong ti algarroba iti agsapa
iti agsapa, tumayab manen dagiti tuwato iti nangato
agimaldit manen ti kurarayan a pluma…


--JIMMY M. AGPALO, JR.
Disiembre 6, 2004

5 comments:

ariel said...

Dear Jim:
goodness, thanks! nagsayaaten daytoy gumil blog ta makapagsisinnungbattayo, aya. somebody has to write this story of the gumil blog. ania ngata no agideklaratayon ti independensiatayo iti gumil filipinas, once and for all? bwahahahaaha!

just kidding, jim. hats off.
Ka Ilyong/Ayi/Ariel, aminen.

jim agpalo, jr. said...

agyamanak met ka ilyong iti isasarungkarmo...

ariel said...

Dear Jim,
Naimbag a paskuam. Naynay koma ti panagadu ti daniwmo ken amin a napipintas a pagtawingan iti adal. I am missing your Pangasinense--I know my mother would have loved declaiming your poems in this language. Please, more of the Pangasinense as well. We need not lose any of our lits and languages b/c that will be a real lost.
Masapul ni Dr. Marot Flores (UP Diliman) ti kakastoy.

Toast to you--and wishing you the best this coming year.
Ariel

jim agpalo, jr. said...

indaniwko ti kaguduana daytoy sadiay up baguio...adu ngamin dagiti dandaniw a naibasa a saan laeng nga English, Tagalog ken Iluko no dipay ket dagiti pay dadduma a lenguahe...kadaydi a kaudian a reading...ngem agsipud ta atiddog, diay la udina, hehehe...kas ken ni Mang Butch Macansantos a nangidaniw iti chabacano...

ariel said...

Dear Jim,
your duty now is to recover the lost and stolen wisdom in the languages you know. pagrebbengan dayta, kabsat, ket sika laeng ti naidumduma a makaaramid ken makatungpal iti kasta.

ala ngarud, maysa a tangguap ti tapuy/tafey para kenka.
ariel